آسٹریلیا:2 طیارے آپس میں ٹکرا گئے، پائلٹ ہلاک

آسٹریلیا کے شہر سڈنی میں پرواز کے دوران دو چھوٹے طیارے آپس میں ٹکرا گئے۔

جنوب مغربی سڈنی میں یہ دونوں طیارے فضا میں ایک دوسرے سے متصادم ہوئے۔ حکام کے مطابق ٹکراؤ کے نتیجے میں ایک طیارہ زمین پر گر کر تباہ ہوگیا اور اس کا پائلٹ موقع پر ہی ہلاک ہو گیا، جس کی لاش ریسکیو عملے نے ملبے سے برآمد کی۔

دوسرا طیارہ تاہم بحفاظت ہوائی اڈے پر اترنے میں کامیاب رہا اور اس کا پائلٹ محفوظ رہا۔

حکام نے بتایا کہ حادثہ نیپیئر فیلڈ ایئر فیلڈ کے قریب پیش آیا۔ مقامی باشندوں کو جائے وقوعہ کے قریب جانے سے روک دیا گیا ہے۔

ابھی تک یہ واضح نہیں ہو سکا کہ دونوں طیارے ایک دوسرے سے کیسے ٹکرائے۔ واقعے کی تحقیقات آسٹریلین ٹرانسپورٹ سیفٹی بیورو کرے گا۔

ابتدائی معلومات کے مطابق یہ دونوں طیارے مزید دو طیاروں کے ساتھ مل کر فضائی کرتب پر مبنی پرواز میں شریک تھے اور واپسی کے دوران حادثے کا شکار ہوئے۔ دونوں پائلٹس فریڈم فارمیشن ڈسپلے ٹیم سے وابستہ تھے۔