عائزہ خان نے اداکاری کی تعلیم کیلئے داخلہ لے لیا

مقبول اداکارہ عائزہ خان نےلندن میں اداکاری کی تعلیم کے لیے داخلہ لے لیا۔

عائزہ خان نے انسٹاگرام پوسٹ میں لندن کے ’رائل اکیڈمی آف ڈراماٹک آرٹس‘ سے اپنی تصاویر شیئر کرتے ہوئے مداحوں کو بتایا کہ انہوں نے اداکاری کی تعلیم کے لیے داخلہ لے لیا۔

اداکارہ نےاپنی پوسٹ میں بتایا کہ وہ شروع سے ہی اداکاری کی تعلیم لینا چاہتی تھیں لیکن ایسا ممکن نہیں ہوسکا تھا اور اب موقع ملنے پر وہ اپنا دیرینہ خواب پورا کر رہی ہیں۔

عائزہ خان نےبتایا کہ انہوں نے محض17 برس کی عمر میں اداکاری شروع کی تھی، جس وجہ سےانہیں اداکاری کی تعلیم حاصل کرنے کا موقع نہیں پایا تھا جب کہ دوسری بھی متعدد وجوہات تھیں۔

عائزہ خان کے مطابق وہ بچپن سے ہی تھیٹر کی تعلیم لینا چاہتی تھیں مگر اداکاری سمیت خاندان اور دوسری ذمہ داریوں میں مصروف رہنے کی وجہ سے وہ پڑھ نہیں پا رہی تھیں مگر اب جب انہیں موقع ملا تو انہوں نےتھیٹر کی تعلیم کیلئےلندن میں داخلہ لے لیا۔

اداکارہ نے لکھا کہ وہ ادھیڑ عمری میں دوبارہ تعلیمی ادارے میں جانے سے خود کو پہلے کی طرح کم عمر سمجھ رہی ہیں اور انہیں اپنا بچپن یاد آگیا جب ان کے والدین ان کی تعلیم کے لیے کوشاں رہتے تھے۔

اداکارہ نے لکھا کہ والد انہیں اسکول چھوڑنے اور اسکول سے لینے کے وقت فخر محسوس کرتے تھے اور اب بھی وہ ان پر فخر کرتے ہوں گے اور وہ والدین کی مدد اور معاونت کی وجہ سے ہی آج دوبارہ پڑھنے کے قابل ہو رہی ہیں۔