بلوچستان: بارکھان کے کرش پلانٹ پر نامعلوم افراد کا حملہ، تین مزدور اغوا
بلوچستان کے ضلع بارکھان میں سکیورٹی صورتحال کشیدہ ہو گئی جب نامعلوم مسلح افراد نے زرغون کنسٹرکشن کمپنی کے کرش پلانٹ (سنگ شکن پلانٹ) پر رات گئے حملہ کر دیا۔
ذرائع کے مطابق حملہ آوروں نے پہلے پلانٹ پر فائرنگ کی اور موسیٰ خیل سے تعلق رکھنے والے تین مزدوروں کو اغوا کر کے لے گئے۔ اس دوران پلانٹ کے قریب قائم پولیس چوکی پر بھی حملہ کیا گیا، جہاں موجود تین پولیس اہلکاروں سے سرکاری اسلحہ چھین لیا گیا اور ملزمان فرار ہو گئے۔
حکام کا کہنا ہے کہ پلانٹ پر شدید فائرنگ کے باعث مشینری کو جزوی نقصان پہنچا اور کام معطل ہو گیا۔ اغوا ہونے والے مزدور روزانہ کی بنیاد پر کمپنی میں کام کر رہے تھے۔
واقعے کے بعد سیکیورٹی فورسز، پولیس، لیویز اور فرنٹیئر کور (FC) نے سرچ آپریشن شروع کر دیا ہے، تاہم ابھی تک اغوا شدگان کی بازیابی یا حملہ آوروں کی گرفتاری کی اطلاع نہیں ملی۔
یہ حملہ بلوچستان میں تعمیراتی اور انفراسٹرکچر پروجیکٹس پر کام کرنے والے مزدوروں اور سیکیورٹی اہلکاروں کے خلاف حالیہ واقعات کی ایک نئی کڑی ہے۔ ماہرین کے مطابق اس قسم کے حملے پروجیکٹس کو روکنے اور علاقے میں خوف و ہراس پیدا کرنے کے لیے کیے جاتے ہیں۔
ضلعی انتظامیہ نے متاثرہ علاقوں میں سیکیورٹی مزید سخت کر دی ہے اور عوام سے کہا ہے کہ کسی بھی مشکوک حرکت کی فوری اطلاع دیں۔ زرغون کنسٹرکشن کمپنی کے حکام نے بھی واقعے کی تصدیق کی ہے اور اغوا شدگان کے اہل خانہ سے رابطہ کر رہے ہیں۔
