بلاول بھٹوکی جانب سےسیلاب متاثرین میں گھروں کی دستاویز ات تقسیم

چیرمین پیپلز پارٹی بلاول بھٹو زرداری نے سیلاب زدگان کو نئے گھروں کی دستاویزات سپرد کردی ہیں۔

پاکستان پیپلزپارٹی کے چیئرمین بلاول بھٹو زرداری تعلقہ میروخان کے گاؤں نیو تھارو وڈھو پہنچے جہاں انہوں نے سیلاب متاثرین کے لیے سندھ پیپلز ہاؤسنگ اسکیم کے تحت تعمیر کیے گئے گھروں کا دورہ کیا۔

چیئرمین بلاول بھٹو نے منصوبے کے تحت تعمیر ہونے والے گھروں کی ملکیّت کی دستاویزات خواتین میں تقسیم کیں اور کہا کہ پاکستان پیپلزپارٹی کی سندھ حکومت صوبے میں دنیا کا سب سے بڑا مفت رہائشی منصوبہ تیزی سے مکمل کر رہی ہے۔

انہوں نے کہا کہ سیلاب متاثرین کی بحالی کا جو وعدہ پیپلزپارٹی نے کیا تھا وہ اب تکمیل کے مراحل میں ہے۔ ان کے مطابق سندھ کی 21 لاکھ خواتین کو گھروں کا مالک بنانا ایک خاموش سماجی انقلاب کی ابتدا ہے، جس کے مثبت اثرات آنے والے برسوں میں نمایاں ہوں گے۔

بلاول بھٹو زرداری نے مزید کہا کہ اس اقدام سے نہ صرف خواتین کو بااختیار بنایا جا رہا ہے بلکہ آئندہ نسلوں کے لئے بہتر مستقبل کی بنیاد بھی رکھی جا رہی ہے۔