چیف کمشنر اسلام آباد کا ماڈل جیل منصوبے کا دورہ، جلد تکمیل کی ہدایت
چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا نے سیکٹر H-16 میں زیر تعمیر اسلام آباد ماڈل جیل منصوبے کا دورہ کیا اور جاری ترقیاتی کاموں کا تفصیلی جائزہ لیا۔ منصوبہ کے اعلیٰ معیار اور جلد از جلد تکمیل کو یقینی بنانے کی ہدایت کی۔
چیف کمشنر اسلام آباد محمد علی رندھاوا کے ماڈل جیل منصوبے کے دورے کے موقع پر ممبر انجینئرنگ سید نفاست رضا، ڈی جی ورکس اور دیگر متعلقہ افسران نے انہیں منصوبے پر ہونے والی پیش رفت کے حوالے سے بریفنگ دی۔ چیئرمین سی ڈی اے محمد علی رندھاوا نے ہدایت کی کہ منصوبے کے تمام ترقیاتی کاموں میں اعلیٰ معیار کو یقینی بنایا جائے اور جلد از جلد مکمل کیا جائے۔
چیئرمین سی ڈی اے نے اسلام آباد ماڈل جیل کے ایڈمن بلاک اور باورچی خانے کی تعمیر رواں ماہ مکمل کرنے کی ہدایت دی۔ انہوں نے کہا کہ جیل کے ہسپتال اور بیرکس سمیت دیگر تعمیراتی کام بھی اسی ماہ مکمل کیے جائیں۔
محمد علی رندھاوا نے ماڈل جیل کے اطراف دیدہ زیب لینڈ اسکیپنگ اور ماحول دوست شجرکاری کے کام کا آغاز کرنے، باقی ماندہ باؤنڈری والز کی جلد تکمیل اور تمام داخلی دروازوں کی تنصیب فوری مکمل کرنے کی بھی ہدایات جاری کیں۔ انہوں نے روڈ انفراسٹرکچر کے کام کو تیز کرنے اور پانی کی فراہمی کےلیے ٹیوب ویل کی تنصیب جلد شروع کرنے پر زور دیا۔
مزید برآں چیئرمین سی ڈی اے نے ڈرینج اور سیوریج سسٹم کے کام فوری مکمل کرنے اور بجلی کی فراہمی یقینی بنانے کےلیے آئیسکو کے ساتھ مؤثر رابطہ رکھنے کی ہدایت کی۔ انہوں نے پراجیکٹ ڈائریکٹر اور ریزیڈنٹ انجینئرز کو ہدایت کی کہ منصوبے پر جاری تمام تعمیراتی سرگرمیوں کی کڑی نگرانی کی جائے تاکہ اسلام آباد ماڈل جیل منصوبہ اعلیٰ معیار کے ساتھ بروقت مکمل ہو سکے۔
