9 مئی کیس : طبی بنیاد پر ضمانت دی تو تمام قیدیوں کو رہا کرنا پڑے گا، چیف جسٹس
جناح ہاؤس حملہ کیس کے ملزم کی درخواست ضمانت کی سماعت کے دوران چیف جسٹس یحییٰ آفریدی نے ریمارکس دیے کہ میڈیکل گراؤنڈ پر ضمانت دی تو تمام قیدیوں کو رہا کرنا پڑے گا۔
سپریم کورٹ میں جناح ہاؤس حملہ کیس کے ملزم علی رضا کی درخواست ضمانت پر سماعت چیف جسٹس یحییٰ آفریدی کی سربراہی میں 3 رکنی بینچ نےکی۔
پراسکیوٹر پنجاب ذوالفقار نقوی نے دلائل دیتے ہوئے کہا کہ علی رضا کو رنگے ہاتھوں گرفتار کیا گیا،علی رضا پر پولیس کو پتھرائو اور ڈنڈے سے زخمی کرنےکا الزام ہے۔
ملزم کے وکیل سمیر کھوسہ نے کہاکہ علی رضا کے خلاف موقع پر موجودگی کا کوئی آڈیو یا ویڈیو ثبوت موجود نہیں ہے جب کہ علی رضا کی عمر صرف 20 سال ہے اور وہ بیمار بھی ہیں۔چیف جسٹس نے ریمارکس دیے میڈیکل گراؤنڈ پر ضمانت دی تو تمام قیدیوں کو رہا کرنا پڑےگا، ملزم نوجوان ہے تو پراسکیوٹر جنرل خود معاملہ دیکھیں۔عدالت نے مزید سماعت بدھ تک ملتوی کردی۔
یاد رہےکہ 9 مئی 2023 کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیاتھا جس کے دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی،سول اور نجی تنصیبات کو نذر آتش کیا گیا،سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد جاں بحق اور 290 زخمی ہوئے تھے۔
مظاہرین نے لاہور میں کور کمانڈر کی رہائش گاہ پر بھی دھاوا بول دیاتھا جسے جناح ہاؤس بھی کہا جاتا ہے اور راولپنڈی میں واقع (جی ایچ کیوکا ایک گیٹ بھی توڑ دیا تھا۔
اس کے بعد ملک بھر میں قانون نافذ کرنے والے اداروں کےساتھ لڑائی،توڑ پھوڑ اور جلاؤ گھیراؤ میں ملوث 1900 افراد کو گرفتار کرلیا گیا تھا جب کہ عمران خان اور ان کی پارٹی رہنماؤں اور کارکنان کے خلاف مقدمات بھی درج کیے گئے تھے۔
