علی امین گنڈاپورکا 2سابق وزرا کوکابینہ میں شامل کرنے سے انکار
وزیراعلیٰ خیبر پختونخوا علی امین گنڈا پور نے2سابق وزرا کامران بنگش اور تیمور جھگڑا کو کابینہ میں شامل کرنے سے انکار کر دیا ہے۔
ذرائع کے مطابق علی امین گنڈاپور نے خیبر پختونخوا کے سابق وزرا کامران بنگش اور تیمور جھگڑا کو کابینہ میں شامل نہ کرنے کے فیصلے پر بانی پی ٹی آئی کو رضامند کرلیا ہے۔
سابق وزیر خزانہ کے پی تیمور سلیم جھگڑا کاگفتگو کرتے ہوئے کہنا تھا کہ یہ اندرونی معاملہ ہے،اس پرکوئی تبصرہ نہیں کرسکتا،میں کچھ کہوں گا تو بانی پی ٹی آئی کےمقصد کو نقصان پہنچےگا۔
تیمور جھگڑا نےمزید کہا کہ میں ساتھیوں کی پیٹھ میں چھرا گھونپنے پریقین نہیں رکھتا،بانی پی ٹی آئی نے مجھے پہلی پی ٹی آئی حکومت میں 2 بڑی وزارتیں دی تھیں اوراب بھی انہوں نے مجھے بلایا تھا لیکن ملاقات کی اجازت نہیں دی گئی۔
دوسری جانب مشیر اطلاعات خیبرپختونخوا بیرسٹر محمد علی سیف نے اس حوالے سے کہا کہ یہ پارٹی کا اندرونی معاملہ ہےاوراندرونی معاملے پر میڈیا پر کوئی بات کہنا ضروری نہیں۔
ذرائع کے مطابق بانی پی ٹی آئی نےکچھ عرصےقبل علی امین کوکامران بنگش اور تیمور جھگڑا کو کابینہ میں شامل کرانے کا کہا تھا اوراس حوالے سے پارٹی کے سینئر رہنماؤں نے وزیراعلیٰ کے پی کو عمران خان کا پیغام پہنچایا تھا۔
