جنوبی وزیرستان کے مختلف علاقوں میں جزوی کرفیو نافذ کرنے کا فیصلہ

خیبرپختونخوا کے علاقے جنوبی وزیرستان کے مختلف علاقوں میں جزوی کرفیو نافذ کرنے کا فیصلہ کرلیاگیا، اعلامیے کےمطابق بینی زائی راغزائی سے جنڈولہ تک کل صبح 6 سے شام 6 بجے تک کرفیو نافذ رہے گا۔

ڈپٹی کمشنر (ڈی سی ) ناصر خان کےمطابق زالئی سے نیو کیڈٹ کالج وانا تک سڑک بند رہے گی، جب کہ تنائی،سرویکئی، جنڈولہ روڈ بھی بند رہے گا،وانا گومل زام کی سڑک مسافروں کےلیے کھلی رہے گی،البتہ احمد وام سے کوٹکئی تک کی سڑک بند رہےگی۔

ڈپٹی کمشنر کے مطابق بی بی رغزئی سے جنڈولہ تک کی سڑک بھی بند رکھنےکا اعلان کیا گیا ہے۔

جنوبی وزیرستان اور ٹانک کے کچھ علاقوں میں آج کرفیو نافذ ہے،وانا سے انگور اڈہ اور وانا سے ٹانک جانےوالی سڑکیں کھلی رہیں گی،ڈپٹی کمشنر نے عوام سے قانون نافذ کرنےوالے اداروں کے ساتھ تعاون کی اپیل کی ہے۔

ٹانک میں سکیورٹی خدشات کےباعث آج بعض راستے مکمل طور پر بند رہیں گے، ڈپٹی کمشنر ٹانک نے بھی راستوں کی بندش کا نوٹی فکیشن جاری کر دیا۔

نوٹی فکیشن کےمطابق ٹانک میں کوڑ قلعہ،منزئی، خرگئی،احمد وام اور جنڈولہ روڈ صبح 6 بجے سے شام 6 بجے تک مکمل بند رہیں گے،جب کہ جنوبی وزیرستان کے مسافروں کے لیے وانا براستہ گومل،گڑداوی ٹریفک کےلیے کھلا رہےگا۔

قومی سلامتی کی پارلیمانی کمیٹی کا ان کیمرہ اجلاس18مارچ کوطلب

یاد رہےکہ حالیہ دنوں میں خیبرپختونخوا کے اضلاع جنوبی وزیرستان اور ٹانک میں دہشت گردی اور فورسز پر حملے کے واقعات رپورٹ ہوئے ہیں،جن میں متعدد اہلکار شہید ہوئے،تاہم فورسز کی جوابی کارروائیوں اور آپریشن کے نتیجے میں کئی خوارجی دہشت گردوں کو بھی جہنم واصل کیاگیا ہے، اس کےبعد انتظامیہ کی جانب سے کرفیو کے نفاذ کا فیصلہ سامنے آیاہے۔