مضبوط معیشت اور بہتر خارجہ تعلقات کے بغیر ترقی ممکن نہیں : رانا ثناء اللہ
وزیر اعظم کے مشیر برائے سیاسی امور رانا ثناء اللہ کا کہنا ہے کہ سیاسی استحکام، مضبوط معیشت اور بہتر خارجہ تعلقات کے بغیر ترقی ممکن نہیں۔ اس لیے پاکستان اقتصادی استحکام کےلیے بھرپور اقدامات کررہا ہے۔
مرکزی رہنما مسلم لیگ ن رانا ثناء اللہ سے آسٹریلوی ہائی کمشنر نیل ہاکنز نے ملاقات کی،جس میں دوطرفہ تعلقات،باہمی تعاون اور خطے کی مجموعی صورت حال پر تبادلہ خیال کیا گیا۔
آسٹریلوی ہائی کمشنر نیل ہاکنز نے پاکستان کی دہشت گردی کےخلاف قربانیوں کو سراہتے ہوئے کہاکہ پاکستان نے امن کے قیام کےلیے بےمثال جدوجہد کی ہے۔انہوں نے اس عزم کا اظہار کیاکہ آسٹریلیا پاکستان کے ساتھ مختلف شعبوں میں تعاون کو مزید فروغ دے گا۔
رانا ثناء اللہ نے اس موقع پر کہاکہ پاکستان اور آسٹریلیا کے درمیان مضبوط تعلقات باہمی ترقی کےلیے نہایت اہم ہیں اور دونوں ممالک کو تعلیم،تجارت اور سرمایہ کاری سمیت مختلف شعبوں میں تعاون کو بڑھانا چاہیے۔
وزیر اعظم کے مشیر نے اس بات پر بھی زور دیاکہ پاکستان خطے میں امن و استحکام کےلیے کلیدی کردار ادا کررہا ہے اور عالمی برادری کو قیام امن میں پاکستان کے تجربے سے استفادہ کرنا چاہیے۔
رانا ثناء اللہ نےکہا کہ سیاسی استحکام اور ترقی لازم و ملزوم ہیں اور جمہوری روایات کے فروغ سے ہی ملک میں حقیقی استحکام ممکن ہوگا۔
انہوں نے اس بات پر بھی زور دیاکہ مضبوط معیشت اور بہتر خارجہ تعلقات کے بغیر ترقی ممکن نہیں،اس لیے پاکستان اقتصادی استحکام کےلیے بھرپور اقدامات کررہا ہے۔
کیا بلوچ علیحدگی پسند جس شاخ پر بیٹھے ہیں اسی کو کاٹ رہے ہیں؟
ملاقات کے اختتام پر دونوں رہنماؤں نے دوطرفہ تعلقات کو مزید مستحکم بنانےاور مختلف شعبوں میں تعاون کو فروغ دینے کے عزم کا اعادہ کیا۔
