ڈیانا کے عاشق کا رول ہمایوں کی بجائے فواد کو کیوں نہیں ملا؟
معروف اداکار ہمایوں سعید کو ’’نیٹ فلیکس‘‘ کی ویب سیریز میں لیڈی ڈیانا کے پاکستانی دوست ڈاکٹر حسنات کے رول میں کاسٹ کرنے پر اعتراضات کا سلسلہ شروع ہو گیا، اور یہ سوال کیا جا رہا ہے کہ یہ کردار فواد خان کو کیوں نہیں دیا گیا؟ سینئر اداکارہ سکینہ سموں نے ’’دی کراؤن‘‘ سیریز کیلئے ہمایوں سعید کی بجائے فواد خان کو کاسٹ کیے جانے پر زور دیا ہے اور کہا ہے کہ اداکاری میں جو کلاس فواد خان کی ہے وہ ہمایوں سعید کی نہیں۔ یاد رہے کہ نیٹ فلیکس نے ہمایوں سعید کو برطانوی شاہی خاندان پر بنائی جانے والی ویب سیریز ’’دی کراؤن‘‘ کے پانچویں سیزن کے لیے کاسٹ کیا ہے جس کے بعد ماہرہ خان سمیت دیگر شوبز شخصیات نے ہمایوں کو مبارکباد پیش کی تھی۔
تاہم اب کئی سوشل میڈیا صارفین کے علاوہ سینئر اداکارہ سکینہ سموں نے بھی ڈیانا کے دوست ڈاکٹر حسنات کے رول میں ہمایوں سعید کو کاسٹ کیے جانے پر اظہار ناراضی کرتے ہوئے کہا ہے کہ اس کردار میں فواد خان زیادہ جچیں گے لہذا اس فیصلے پر نظر ثانی کی جانی چاہیے۔ سکینہ سموں نے دلیل دی کہ ہمایوں سعید اگرچہ پاکستانی ڈاکٹر حسنات کی طرح نظر آتے ہیں، تاہم ویب سیریز میں 1990 کا زمانہ دکھایا جائے گا، جس کے لیے پاکستانی ڈاکٹر کے کردار کے لیے فواد خان کو کاسٹ کیا جانا چاہئے تھا۔ ساتھ ہی اداکارہ نے نیٹ فلیکس سے سوال کیا کہ ہمایوں سعید کو کیون منتخب کیا گیا؟
ڈیانا کے عاشق کا رول ہمایوں کی بجائے فواد کو کیوں نہیں ملا؟
اسی طرح اداکارہ نے سوشل میڈیا پر کمنٹ کرنے والی ایک خاتون کو جواب دیا کہ انہیں نہیں لگتا کہ ہمایوں سعید کو جمائما گولڈ سمتھ کے کہنے پر کاسٹ کیا گیا ہوگا۔ سکینہ نے لکھا کہ نیٹ فلیکس والوں نے ہمایوں کے ساتھ دوسرے چار اداکاروں کا آڈیشن لیا ہوگا اور یہ ایک سادہ سا عمل ہے، البتہ وہ خود ایک پاکستانی خاندان کے گرد گھومتی کہانی کی فلم بنا رہی ہیں، جس میں شبانہ اعظمی بھی شامل ہیں۔ سکینہ اس سوال کا جواب دے رہی تھیں کہ کہیں ہمایوں کو جمائما خان نے ہی کاسٹ نہ کروایا ہو، کیونکہ وہ ’دی کراؤن‘ کے پانچویں سیزن کی کہانی لکھنے والی ٹیم کا حصہ رہی ہیں۔ تاہم یہ حقیقت ہے کہ اب جمائما دی کراون کی کہانی لکھنے والی ٹیم کا حصہ نہیں رہی ہیں کیونکہ انہیں ڈیانا کے حوالے سے کچھ حقائق کا مسخ کیے جانے پر اختلاف تھا۔
ہمایوں سعید کی نیٹ فلیکس کی پہلی اوریجنل سیریز میں کاسٹ پر جہاں عام افراد میں بحث جاری ہے، وہیں شوبز شخصیات بھی اس پر اپنی رائے کا اظہار کر رہی ہیں، ابھی یہ واضح نہیں کہ ہمایوں سعید کب شوٹنگ کا حصہ بنیں گے، تاہم خیال کیا جا رہا ہے کہ اس حوالے سے جلد اداکار یا نیٹ فلیکس کی ٹیم اعلان کرے گی۔ اب تک کی خبروں کے مطابق ہمایوں سعید نیٹ فلیکس کی ویب سیریز ’دی کراؤن‘ میں برطانوی شہزادی لیڈی ڈیانا کے مبینہ محبوب پاکستانی سرجن ڈاکٹر حسنات کا کردار ادا کرتے دکھائی دیں گے، دی کراؤن‘ نامی ویب سیریز برطانوی شاہی خاندان پر بنائی جانے والی سیریز ہے، جس کے چار سیزن ریلیز کیے جا چکے ہیں۔ سیریز کا چوتھا سیزن نومبر 2020 میں ریلیز ہوا، جس میں 1977 سے لے کر 1986 یا 1988 تک کا دور دکھایا گیا، چوتھے سیزن میں جہاں لیڈی ڈیانا کا کردار دکھایا گیا، وہیں اس میں پہلی برطانوی خاتون وزیراعظم مارگریٹ تھیچر سمیت کئی نئے کردار بھی دکھائے گئے، اب پانچویں سیزن میں 1988 سے لے کر 1999 تک کا دور دکھائے جانے کا امکان ہے۔
