اعلیٰ سطحی اجلاس میں ملک دشمن مہم کا منہ توڑ جواب دینے کا فیصلہ

وزیر اعظم شہباز شریف کی زیر صدارت وفاقی اور صوبائی قیادت کے اہم اجلاس میں جعفر ایکسپریس کے حملہ آوروں کو بےنقاب کرنے کا فیصلہ کرلیا گیا، روایتی اور ڈیجیٹل میڈیا پر ملک دشمن مہم کا منہ توڑ جواب دیا جائے گا۔

اسلام آباد میں وزیر اعظم شہباز شریف کی زیر صدارت ہونے والے اجلاس میں عسکری و سول قیادت، چاروں صوبوں بشمول آزاد کشمیر اور گلگت بلتستان سے بھی نمائندے بھی شریک ہوئے۔ اجلاس گزشتہ روز وزیر اعظم ہاؤس میں ہوا۔

اعلی سطحی اجلاس میں نیشنل ایکشن پلان کے تحت قومی بیانیے کو مضبوط کرنے پر اتفاق کیا گیا جب کہ قومی بیانیہ کمیٹی کو دہشت گردوں اور شرپسندوں کے سدباب کےلیے مؤثر اور سرگرم بیانیہ بنانے کی ہدایات دی گئیں۔

اجلاس میں فیصلہ کیاگیاکہ قومی بیانیے اور ملک کی سلامتی کے خلاف کسی بھی قسم کے مواد کا سدباب کیا جائے گا جب کہ ملکی سلامتی اور ہم آہنگی کےلیے تمام صوبوں کا تعاون اور آپسی روابط بڑھانے پر اتفاق کیا گیا۔

چاروں صوبوں نے اس حوالے سے تعاون پر اتفاق کیاکہ قومی بیانیے کو نوجوانوں تک پہنچانے کےلیے فلم اور ڈراموں میں ایسے قومی موضوعات اپنائے جائیں گے جس سے دہشت گردوں کے بیانیے کا موثر مقابلہ ہوگا جب کہ قومی بیانیے کےلیے ڈیجیٹل میڈیا پر بھی مواد نشر کیا جائے اور دہشت گردی کے منفی معاشرتی اثرات کو اجاگر کیا جائے۔

اجلاس میں فیصلہ کیاگیا کہ سوشل میڈیا پر جھوٹی خبروں کا سد باب کیا جائے گا، ڈیپ فیک اور دیگر ذرائع سے بنائی گئی جھوٹی معلومات اور مواد کا مستند معلومات سے بھرپور جواب دیا جائےگا،قومی نصاب میں دہشت گردی کے حوالے سے آگاہی شامل کی جائے گی۔

حکومتی ردعمل: بلوچ مظاہرین کی رہائی کا اقوم متحدہ کا مطالبہ مسترد

یاد رہےکہ 11 مارچ کو کالعدم بی ایل اے نے بلوچستان کے علاقے بولان میں جعفر ایکسپریس پر حملہ کرکے مسافروں کو یرغمال بنالیا تھا، سکیورٹی فورسز نے آپریشن کر ے تمام دہشت گردوں کو ہلاک کردیا تھا۔