فیصل قریشی کا شمار ظالم ڈائریکٹرز میں کیوں ہوتا ہے؟

ڈرامہ اور فلم انڈسٹری میں اپنی صلاحیتوں کا لوہا منوانے والے اداکار فیصل قریشی نے انکشاف کیا ہے کہ ذاتی طور پر بہت سخت ڈائریکٹر ہوں، جو فنکار وقت پر شوٹنگ کے لیے نہیں آتے ہیں، ان کے سین کٹ کر دیتا ہوں۔

فیصل قریشی عید الفطر پر ریلیز ہونے والی فلم ’منی بیک گارنٹی‘ کا ٹریلر ریلیز کر دیا گیا، فلم کی کاسٹ میں نامور فنکار فواد خان، عائشہ عمر، میکال ذوالفقار سمیت دیگر نام بھی شامل ہیں جبکہ سابق پاکستانی باولر وسیم اکرم اور ان کی اہلیہ بھی ایکٹنگ کے میدان میں قدم رکھنے کو تیار ہیں۔

جیو ٹی وی کے پروگرام سے گفتگو کرتے ہوئے ہدایتکار فیصل قریشی نے کہا کہ فلم کی کہانی انہوں نے دو ہفتوں میں مکمل کر لی تھی البتہ فلم کو شوٹ کرنے کا مرحلہ کرونا کی وجہ سے سست رہا ہے۔

ایک سوال کے جواب میں فیصل نے بتایا کہ جو سیٹ پر نہیں آتے تھے ان کے سین ہم نے کاٹ دیئے جس کے بعد سے وہ ڈر گئے اور وقت پر آنے لگے، انہوں نے نام بتانے سے انکار کرتے ہوئے کہا کہ جن کے ساتھ یہ کیا ہے وہ اپنے نام خود بتا دیں گے لیکن سیٹ پر سب سے زیادہ تنگ میں نے ہی کیا میں بڑا ظالم ڈائریکٹر ہوں۔

فیصل قریشی کے مطابق وسیم اکرم کے ساتھ پہلے بھی کام کرتے رہے ہیں ایک کردار کیلئے خیال آیا کہ ان سے بات کروں جب ان سے بات ہوئی تو انہیں یہ کردار پسند آیا اور فوراًحامی بھرلی ، ان کے ساتھ کمرشلز میں کام کرنے کا پہلے بھی تجربہ رہا ہے، وہ فطرتاً مزاحیہ مزاج رکھتے ہیں اور پردے کے پیچھے بھی وہ کوئی نہ کوئی مذاق کرتے ہی رہتے تھے لیکن ان کا کردار مزاحیہ نہیں ہے۔

فیصل قریشی کے مطابق جہاں تک شنیرا کا تعلق ہے تو وہ بھی اپنے کردار کے بارے میں پرجوش تھیں اور وہ ناظرین کو غیر ملکی صحافی کے کردار میں نظر آئیں گی، فلم کو عیدالفطر پر ریلیز کیا جائے گا۔

فلم میں اہم کردار ادا کرنے والے وسیم اکرم نے بتایا کہ وہ 30 سالوں سے اشتہارات میں کام کر رہے ہیں، مگر اشتہارات میں کام کرنا آسان ہوتا ہے کیوںکہ وہ ایک یا دو منٹ کا کام ہوتا ہے۔

’اس فلم کے لیے جب مجھے فیصل قریشی کا فون آیا تو چونکہ میں ان کے ساتھ ایک موبائل فون کمپنی کے لیے کچھ دلچسپ اشتہارات میں کام کرچکا ہوں، اور وہ شخص بہت مختلف سوچتا ہے، اس لیے جب انہوں نے فلم میں میرا حصہ سنایا تو مجھے اچھا لگا۔

وسیم اکرم نے تسلیم کیا کہ اداکاری مشکل کام ہے، ایک ایک لائن یاد کرنا ہوتی ہے، اس لیے تمام اداکاروں کو سلام ہے، اداکاری کا کام لگتا آسان ہے مگر ہوتا نہیں اور جو نیا ہو اس کے لیے تو زیادہ مشکل ہوتا ہے۔

فلم میں اپنے کردار کے بارے میں وسیم نے بتایا کہ وہ ایک فرضی ملک کے فرضی بینک کے صدر ہیں اور فواد خان ان کے جونیئر افسر بنے ہیں، فلم میں ان کے اور فواد کے درمیان کرسی کی جنگ ہے۔

کیا صدر علوی نے واقعی آئین شکنی کی ہے؟