اسلام آباد ہائیکورٹ:5 ججز نے سنیارٹی کا معاملہ پھر اٹھا دیا

اسلام آباد ہائی کورٹ میں نئی تعیناتی کے باوجود5ججز  نےججز کی سینیارٹی کا معاملہ ایک بار  پھر اٹھا دیا ہے۔

5ججزنے سینیارٹی لسٹ کے خلاف ریپریزنٹیشن چیف جسٹس اسلام آباد ہائی کورٹ کو بھجوا دی ہے۔

ذرائع کے مطابق  چیف جسٹس پاکستان یحییٰ آفریدی کوبھی ججز ریپریزنٹیشن کی کاپی بھجوا دی گئی ہے۔

واضح رہےکہ اسلام آباد ہائی کورٹ کے چیف جسٹس عامر فاروق کی منظوری سےگزشتہ روز ججز کی سینیارٹی لسٹ جاری کی گئی تھی۔

ریپریزنٹیشن بھیجنے والوں جسٹس محسن کیانی، جسٹس طارق محمود جہانگیری اور جسٹس بابر ستار ،جسٹس سردار اعجاز اسحاق خان اور جسٹس ثمن رفعت امتیاز شامل ہیں۔

جسٹس میاں گل حسن اورنگزیب اور جسٹس ارباب محمد طاہر کی جانب سے الگ سے ریپریزنٹیشن فائل کیے جانے کا امکان ہے۔

ججز کی ریپریزنٹیشن میں کہا گیا ہےکہ  جج جس ہائی کورٹ میں تعینات  ہوتا ہے اُسی ہائی کورٹ کے لیے حلف لیتا ہے،  آئین کی منشا کے مطابق دوسری ہائی کورٹ میں ٹرانسفر ہونے پر جج کو نیا حلف لینا پڑتا ہے، دوسری ہائیکورٹ میں ٹرانسفر  ہونے والے جج کی سینیارٹی نئے حلف کے مطابق طے ہوگی۔

عدالتی ذرائع نے کہا ہےکہ  ججز کی جانب سے دائر ریپریزنٹیشن سینیارٹی سے متعلق ہے، ججز کے تبادلے سےکوئی تعلق نہیں۔

ذرائع کے مطابق ریپریزنٹیشن میں چیف جسٹس یحییٰ آفریدی سے جوڈیشل کمیشن اجلاس مؤخرکرنے کی درخواست کی گئی ہے۔ججزنےکہا ہےکہ سینیارٹی کا مسئلہ حل ہونے تک چیف جسٹس یحییٰ آفریدی جوڈیشل کمیشن اجلاس ملتوی کریں۔