جعفر ایکسپریس حملہ : بھارتی میڈیا دہشت گردوں کو سپورٹ کررہا تھا، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ جعفر ایکسپریس حملے میں بھارتی میڈیا دہشت گردوں کو سپورٹ کر رہا تھا۔ بھارتی میڈیا جعلی اے آئی ویڈیوز کے ذریعے پروپیگنڈا کرتا رہا اور دہشت گردوں کی پروپیگنڈا ویڈیوز دنیا کو دکھاتا رہا۔

جعفر ایکسپریس پر حملے کے حوالے سے وزیر اعلیٰ بلوچستان سرفراز بگٹی کے ساتھ پریس کانفرنس کرتے ہوئے ترجمان پاک فوج لیفٹیننٹ جنرل احمد شریف نے کہا کہ دہشت گردوں نےمنظم انداز میں کارروائی کی، جعفر ایکسپریس واقعہ انتہائی دشوار گزار علاقے میں پیش آیا، ٹرین سے پہلے دہشت گردوں کی بڑی تعداد نے ایف سی چیک پوسٹ پر حملہ کیا، جہاں ایف سی کے 3 جوان شہید ہوئے۔

ڈی جی آئی ایس پی آر لیفٹیننٹ جنرل احمد شریف چوہدری نے بتایا کہ دہشت گردوں نے آئی ای ڈی کی مدد سے ریلوے ٹریک کو دھماکے سے اڑایا اور مسافروں کو ٹرین سے اتار کر ٹولیوں میں تقسیم کیا، سوشل میڈیا پر ٹرین واقعے کی اے آئی سے جعلی ویڈیوز بنائی گئیں،بھارتی میڈیا جعلی اے آئی ویڈیوز کے ذریعے پروپیگنڈا کرتا رہا۔

پریس کانفرنس کے آغاز میں وزیر اعلیٰ بلوچستان سرفراز بگٹی نے کہاکہ سکیورٹی فورسز کو کامیاب کارروائی پر خراج تحسین پیش کرتا ہوں،پاک فوج کا یرغمالیوں کی رہائی کو ممکن بنانا قابل تعریف ہے۔

سرفراز بگٹی نے کہاکہ بدامنی پھیلانے والے عناصر سے کوئی رعایت نہیں برتی جائے گی،علیحدگی پسندوں سے دہشت گردوں جیسا برتاؤ کرنے کا فیصلہ کیاہے۔

وزیر اعلیٰ بلوچستان نے جعفر ایکسپریس پر حملے کی مذمت کرنے پر امریکا، چین، برطانیہ، ایران، روس، ترکی،اردن، بحرین،متحدہ عرب امارات، یورپ،اقوام متحدہ کے جنرل سیکریٹری اور یورپی سفیر کا شکریہ ادا کرتا ہوں۔

سرفراز بگٹی نے کہا کہ بلوچ روایات میں اس طرح واقعات کو بری نگاہ سے دیکھا جاتا ہے جس کا بلوچ روایات سے کوئی تعلق نہیں، بلوچ روایتوں کے امین ہیں مگر دہشت گردوں نے ان تمام روایات کو پامال کر دیا ہے، اس لیےمیں کہتاں ہیں انہیں بلوچ نہ کہاجائے۔

سرفراز بگٹی نے کہاکہ جس طرح اسلام کے نام پر دہشت گردی کرنے والے خوارج کا اسلام سے کوئی تعلق نہیں ہے،اسی طرح بلوچیت کے نام پر دہشت گردی کرنےوالوں کا بلوچیت سے کوئی تعلق نہیں ہے، اس لڑائی کا بلوچیت اور حقوق سے کوئی تعلق نہیں ہے، یہ خالصتاً شیطانی قوتیں اور دہشت گرد ہیں، جو پاکستان کو عدم استحکام سے دوچار کرکے اسے توڑنا چاہتے ہیں۔