عمران خان صحتمند ہیں،علیمہ خان نے طبیعت خرابی کی تردید کردی
بانی چیئرمین پاکستان تحریک انصاف عمران خان کی ہمشیرہ علیمہ خان کہا ہے کہ عمران خان کے کان میں کوئی تکلیف نہیں نہ ان کے دماغ میں انفیکشن ہے۔
سابق وزیراعظم عمران خان کی ہمشیرہ علیمہ خان کا اڈیالہ جیل کے باہر صحافیوں سے گفتگو میں کہنا تھا کہ عمران خان صحتمند لگ رہے تھے، خوش بیٹھے تھے لیکن ان کو یہ نہیں معلوم کہ باہر ہم کتنا پریشان تھے، ان کو تو نہیں پتا کہ باہر ان کی صحت کےبارے میں کس قسم کی افواہیں پھیلائی جارہی تھیں، ان کے کان میں کوئی تکلیف نہیں ہے۔
علیمہ خان نےکہا کہ جو لوگ ان کی صحت کےبارے میں بات کرتے ہیں تو وہ یہ بتا دیا کریں کہ ان کے ذرائع کیا ہیں، ہم ہمیشہ سنتےہیں کہ لوگوں کےپاس ذرائع ہیں تو وہ ہمیں بھی بتا دیں کیوں کہ ہمارے پاس کوئی ذرائع نہیں ہیں کہ عمران خان کی صحت کا پوچھیں، ہم اگر جیل سپرینٹنڈنٹ کو بھی فون کریں تو وہ ہمارا فون اٹینڈ نہیں کرتے۔
عمران خان کی ہمشیرہ نے کہا کہ جو لوگ ٹی وی پر بیٹھ کر عمران خان کے کان پر بات کرتے ہیں، سوشل میڈیا پر باتیں چل رہی ہیں کہ عمران خان کے دماغ میں انفیکشن چلا گیا ہے، یہ لوگ کیا بتانا چاہتے ہیں کہ عمران خان کو کچھ ہوگیا ہے۔عمران خان کو کچھ ہونا بھی نہیں چاہیے، اگر یہ عمران خان کے ساتھ کچھ کرنے کی کوشش کررہے ہیں تو یہ بھول جائیں، ہم اور سارے پاکستانی عمران خان کی حفاظت کریں گے۔
