مریم نواز نے’ون پنجاب ون اسٹینڈر‘ پالیسی اپنانے کی منظوری دیدی
وزیرِ اعلیٰ پنجاب مریم نواز نے یکساں ترقی اور ڈسپلن کے لیے ’ون پنجاب ون سٹینڈر‘ پالیسی اپنانے کی منظوری دے دی۔
وزیرِ اعلیٰ پنجاب مریم نواز کی زیرِ صدرات کابینہ کا اجلاس منعقد ہوا جس میں وزیر اعلیٰ کو انفرااسٹرکچر اسٹینڈرڈائزیشن پر بریفنگ دی گئی۔
مریم نواز کو بریفنگ کے دوران بتایا گیا کہ پنجاب کا انفرااسٹرکچر بکھری ہوئی تعمیرات نہیں بلکہ یکساں ترقی کی پہچان ہو گا، پنجاب کی سڑکیں، اسکول، اسپتال اور بس سٹاپ اب ’برانڈ پنجاب‘ کے سفیر بنیں گے، ’ون پنجاب، ون سٹینڈرڈ، ون ڈیزائن‘ تعمیرات میں یکسانیت اور عالمی معیار کا نفاذ ہو گا، پنجاب کی ہر شاہراہ، ہر گرین بیلٹ اور ہر فٹ پاتھ ایک ہی عالمی ڈیزائن کے سانچے میں ڈھلے گی۔
اجلاس میں پنجاب میں انفرااسٹرکچر کی مکمل کایا پلٹنے کے لیے خودمختار اتھارٹی بنانے پر غور کیا گیا، وزیرِ اعلیٰ مریم نواز نے سٹینڈرائزڈ ڈیزائن مینول تیار کرنے کا حکم بھی دیا۔
مریم نواز نے کہا کہ پنجاب اب ایک رنگ اور ایک معیار سے پہچانا جائے گا، ڈسپلن ہی ترقی کا اصل حسن ہے، لاہور سے راجن پور تک ہر گلی، ہر شاہراہ دیدہ زیب اور ہر ادارہ نظم و ضبط کا شاہکار ہو گا، انفرااسٹرکچر اور روڈز فرنیچر کے یکساں ڈیزائن شہر کو جمالیاتی طور پر پرکشش بناتے ہیں۔
