دورہ نیوزی لینڈ : سلمان آغا ٹی ٹوئنٹی اور محمد رضوان ون ڈے ٹیم کے کپتان مقرر

قومی کرکٹ ٹیم کے عبوری ہیڈ کوچ عاقب جاوید نے نیوزی لینڈ کےخلاف سیریز کےلیے ٹی ٹوئنٹی اور ون ڈے ٹیم کا اعلان کردیا۔

قومی کرکٹ ٹیم کے دورہ نیوزی لینڈ کےلیے ون ڈے اور ٹی ٹوئنٹی اسکواڈ کا اعلان کردیا گیا۔

ون ڈے اور ٹی ٹوئنٹی اسکواڈ میں بڑی بڑی تبدیلیاں کر دی گئی ہیں اور بڑے ناموں کو مختلف فارمیٹ میں تقسیم کر دیا گیا۔

قومی ٹیم کے ہیڈ کوچ عاقب جاوید نے اسکواڈ کا اعلان کیا اور بتایا کہ ون ڈے کے کپتان محمد رضوان ہی ہوں گے جب کہ ٹی ٹوئنٹی میں ان کی جگہ سلمان علی آغا ٹیم کی قیادت کریں گے اور شاداب خان نائب کپتان ہوں گے۔

سلمان اور شاداب کو بالترتیب ٹی ٹوئنٹی کپتان اور نائب کپتان مقرر کرنےکا فیصلہ آنے والے دو بڑے ٹورنامنٹس مینز ٹی ٹوئنٹی ایشیا کپ 2025 (ستمبر 2025) اور آئی سی سی مینز ٹی ٹوئنٹی ورلڈ کپ ( فروری مارچ 2026 ) کو دیکھتے ہوئے کیاگیا۔

15 رکنی ون ڈے اسکواڈ : محمد رضوان (کپتان)، سلمان علی آغا (نائب کپتان)، بابر اعظم، عبداللہ شفیق، ابرار احمد، فہیم اشرف، عاکف جاوید، امام الحق، خوشدل شاہ، عرفان خان نیازی، محمد علی، نسیم شاہ، محمد وسیم جونیئر، سفیان مقیم اور طیب طاہر شامل ہیں۔

اوپنر فخر زمان اور صائم ایوب کو طبی مشورے پر دونوں فارمیٹ کےلیے زیر غور نہیں لایا گیا۔

16 رکنی ٹی ٹوئنٹی اسکواڈ: سلمان علی آغا (کپتان)،  شاداب خان (نائب کپتان)،  شاہین شاہ آفریدی، عباس آفریدی، ابرار احمد، حارث رؤف، عبدالصمد، حسن نواز، جہانداد خان، عرفان خان نیازی، محمد علی، خوشدل شاہ، عمیر بن یوسف، محمد حارث، سفیان مقیم اور عثمان خان ہیں۔