پاکستان میں پیٹرولیم مصنوعات کے وافرذخائر ہیں،وزیرخزانہ
وفاقی وزیر خزانہ سینیٹر محمد اورنگزیب نے مارچ کے دوران پیٹرولیم مصنوعات کی مکمل دستیابی کی یقین دہانی کرائی ہے۔
وزیر خزانہ کی زیر صدارت کابینہ کمیٹی برائے پیٹرولیم کی نگرانی کے اجلاس میں ملک میں ایندھن کے وافر ذخائر اور سپلائی چین کی صورتحال پر تفصیلی بریفنگ دی گئی۔
اجلاس میں خام تیل اور ریفائن شدہ پیٹرولیم مصنوعات کے موجودہ قومی ذخائر کا جائزہ بھی لیا گیا۔
بریفنگ کے دوران درآمدی انتظامات، سپلائی چین کی لاجسٹکس اور ایندھن کی دستیابی کے حوالے سے ملک کی پوزیشن تسلی بخش قرار دی گئی۔
کمیٹی کو بتایا گیا کہ مارچ کے لیے پیٹرولیم مصنوعات کی ضروریات مکمل طور پر محفوظ کر لی گئی ہیں اور اپریل کے وسط تک ایندھن کی فراہمی یقینی بنانے کی منصوبہ بندی کی گئی ہے، جبکہ اپریل کے آخر تک دستیابی کو یقینی بنانے کے لیے اقدامات جاری ہیں۔
وزیر خزانہ نے اس موقع پر کہاکہ حکومت پیٹرولیم کی بلا تعطل دستیابی کو یقینی بنانے کے لیے مکمل متحرک ہے، موجودہ ذخائر اور سپلائی مستحکم ہیں، اور عوام کو گھبراہٹ میں خریداری یا غیر ضروری ذخیرہ اندوزی سے گریز کرنے کی ہدایت کی گئی ہے۔
