پاکستان نے صومالیہ کی خودمختاری کی حمایت کردی

نائب وزیراعظم و وزیر خارجہ اسحاق ڈار کا صومالیہ کے وزیر خارجہ عبدالسلام سے ٹیلیفونک رابطہ،صومالیہ کی خودمختاری کی مکمل حمایت کردی۔

اسحاق ڈار نے صومالیہ کی خودمختاری اور علاقائی سالمیت کے لیے پاکستان کی مکمل حمایت کا اعادہ کیا اور ایسی کسی بھی کارروائی کی مذمت کی جو ان کے وقار یا سالمیت کو نقصان پہنچانے کی کوشش کرے۔

صومالیہ کے وزیر خارجہ نے پاکستان کے اس مؤقف پر شکریہ ادا کیا کہ وہ صومالیہ کے ساتھ کھڑا ہے اور اس کی مسلسل اور مستحکم حمایت جاری رکھے ہوئے ہے۔

انہوں نے صومالیہ کے مسائل کو اقوام متحدہ کی سلامتی کونسل میں اٹھانے کے لیے پاکستان کی مدد بھی طلب کی۔

نائب وزیراعظم اسحاق ڈار نے اقوام متحدہ اور دیگر کثیرالجہتی فورمز پر صومالیہ کے لیے پاکستان کی مکمل حمایت کا اعادہ کیا۔

واضح رہے کہ اسرائیل نے صومالی لینڈ کو ریاست کے طور پر تسلیم کر لیا ہے، جس پر اسلامی ممالک نے شدید ردعمل کا اظہار کیا ہے۔

مشترکہ اعلامیے پر پاکستان، فلسطین، قطر، سعودی عرب، صومالیہ اور سوڈان کے علاوہ ترکیہ، یمن، اردن، مصر، الجزائر، کوموروس، جبوتی، گیمبیا، ایران، عراق، کویت، لیبیا اور مالدیپ بھی دستخط کنندگان میں شامل ہیں۔

دفتر خارجہ کے مطابق نائجیریا، عمان اور اسلامی تعاون تنظیم (او آئی سی) نے بھی اس مشترکہ مؤقف کی حمایت کی ہے۔