عمران نے دم کے بہانے مانیکا سے بشری کیسے چھینی؟
بشری بی بی کے سابق شوہر خاور فرید مانیکا نے عمران خان کو شیطان قرار دیتے ہوئے کہا ہے کہ عمران خان پنکی سے دم کروانے کے بہانے میرے گھر آتا تھا اور اس دوران اس نے پٹو ڈال کر پنکی کو مجھ سے چھین لیا اور میرا ہنستا بستا گھر اجاڑ دیا۔غیرشرعی نکاح کیس میں دوران سماعت بشری بی بی کے سابقہ و موجودہ شوہر عمران خان اورخاور مانیکا آپس میں لڑ پڑے، لڑائی میں بشریٰ بی بی بھی کود پڑیں، سابق شوہر کو لعن طعن کرتی رہیں،
بانی پی ٹی آئی نے خاور مانیکا سے کہا تم سے نہیں جج سے بات کررہا ہوں،شادی سے پہلے ناجائز تعلقات نہیں تھے،عمران خان اس دوران قرآن پر حلف لینے کی ضد کرتے رہے۔ خاور مانیکا نے حلف کی پیشکش قبول کرتے ہوئے کہا تم جھوٹ بول رہے ہو، خدا سے ڈرو، جبکہ دوران جرح بشری بی بی کے وکیل مشتعل ہوگئے اور خاور مانیکا کو دھمکی دی کہ مکا مار دوں گا، عدالت سے باہر پھینکنے کی بھی دھمکی دی جس پر جج قدرت اللہ نے انتباہ کیا کہ سختی پر مجبور نہ کریں،فاضل جج نے کہا کہ خاور مانیکا اگر قرآن پر حلف دیتا ہے تو آپ کا جرح کا حق ختم ہوجائے گا جس پر بانی پی ٹی آئی نے کہا کہ خاور مانیکا سے جرح ضروری ہے۔
عدالت سے باہر جاتے ہوئے بانی پی ٹی آئی کی بہنوں نے خاور مانیکا پر یہ جملہ کس دیا کہ ”یہ کیا گند کیا ہے؟“ جس پر خاور مانیکا نے بانی پی ٹی آئی کی بہنوں کو جواب دیا کہ آپ کی نسل گندی ہے ، اس نے گند کیا ہے ، اسی نے خراب کیا ہے،عمران ایک شیطان شخص ہے،
بشریٰ بی بی کے وکیل عثمان گل دوران جرح خاور مانیکا سے لڑ پڑے، مکا مارنے کی کوشش بھی کی، خاور مانیکا نے قرآن پر ہاتھ رکھ کر حلف دینے کی پیشکش کو قبول کرلیا اورجرح کے دوران آبدیدہ ہوگئے۔
جمعرات کو سینئر سول جج قدرت اللہ نے اڈیالہ جیل میں عمران خان اور بشریٰ بی بی کیخلاف دوران عدت نکاح کیس کی طویل سماعت کے دوران چار گواہان شکایت کنندہ خاور مانیکا، نکاح خواں مفتی سعید، گواہ عون چوہدری اور خاورمانیکا کے ملازم لطیف کا بیان قلمبند کیا گیا جبکہ بشریٰ بی بی کے وکیل عثمان گل نے خاورمانیکا اور عون چوہدری پر جرح مکمل کی۔
دوران سماعت پنکی پیرنی کے سابقہ اور موجودہ شوہر کے مابین تلخ کلامی بھی ہوئی۔ بانی پی ٹی آئی نے کہا کہ میں اور میری بیوی قرآن پر حلف دینے کو تیار ہیں کہ ہمارے درمیان ناجائز تعلقات نہیں تھے، میں اپنی بیوی کو کلیئر کرنا چاہتا ہوں۔ اس موقع پر بانی پی ٹی آئی اور بشریٰ بی بی جج کے سامنے پہنچ گئے۔ بشریٰ بی بی نے کہا کہ میرے بیان کے بغیر عدالت کوئی فیصلہ نہیں کرسکتی، بیان کے بغیر عدالت کوئی سزا نہیں سنا سکتی، منافق اور شیطان کو قرآن میں برا کہا گیا ہے۔
اس پر خاور مانیکا بھی جج کے سامنے پہنچ گئے اور بشریٰ بی بی کیساتھ تلخ کلامی شروع کردی۔خاور مانیکا نے بشریٰ بی بی سے مکالمہ کرتے ہوئے کہا کہ بچے سوال کر کرکے تھک گئے مگر تم نے جواب نہیں دیا، چھوٹی بیٹی رات کو اٹھ اٹھ کر روتی ہے، میرا گھر اور بچے برباد کردیئے۔بانی پی ٹی آئی عمران خان نے خاور مانیکا کو جواب دیتے ہوئے کہا کہ چھ سال بعد یاد آیا ہے؟ عدالت قرآن منگوائے ہاتھ رکھ کر حلف دیں گے، خاورمانیکا بھی قرآن پر ہاتھ رکھے۔بشریٰ بی بی کو نکاح کے دن دیکھا ہے۔ قرآن لائیں میں اٹھانے کو تیار ہوں۔ اس پر خاور مانیکا نے کہا کہ تم جھوٹ بول رہے ہو، خدا سے ڈرو، تم نے میرا گھر برباد کیا۔ تم سے نہیں جج سے بات کررہا ہوں، بانی پی ٹی آئی نے عدالت سے قرآن پاک پر حلف لینے کی ضد کی جس پر بانی پی ٹی آئی اور خاور مانیکا دونوں قرآن پر حلف کو تیار ہوگئے۔
فاضل جج نے کہا کہ خاور مانیکا اگر قرآن پر حلف دیتا ہے تو آپ کا جرح کا حق ختم ہوجائے گا۔ اس پر بانی پی ٹی آئی نے کہا کہ خاور مانیکا پر جرح ضروری ہے، اینٹی کرپشن کی حراست میں خاور مانیکا کا سافٹ ویئر اپ ڈیٹ ہوا۔ دوران جرح خاور مانیا نے وکیل صفائی عثمان گل سے کہا کہ مجھ سے ایسے سوالات کررہے ہو جیسے ان پڑھ ہو۔ اس پر عثمان گل غصے میں آگئے اور کہا کہ میں تمہیں اٹھا کر باہر پھینک دوں گا۔ عثمان گل ایڈووکیٹ نے خاور مانیکا کو مکا مارنے کی بھی کوشش کی۔جج قدرت اللہ نے کہا کہ اگر آپ گواہ کو مکا مارنے کی کوشش کریں گے تو جرح کیسے چلے گی، ہم محبت سے چل رہے ہیں، سختی پر مجبور نہ کریں۔
دوران جرح خاور مانیکا نے کہا کہ یہ درست ہے کہ عمران خان عدم موجودگی میں میرے گھر آتے اور ان دونوں کے غیرشرعی تعلقات تھے، مجھے معلوم نہیں کہ غیرشرعی تعلقات پر ملک کا قانون کیا کہتا ہے، یہ درست ہے کہ 2018 سے نومبر 2023 تک اس جرم سے متعلق کوئی شکایت درج نہیں کرائی، یہ بھی درست ہے کہ میں نے اینٹی کرپشن کے مقدمہ میں رہا ہونے کے 10 دن بعد شکایت فائل کی، یہ درست نہیں کہ میں نے شکایت اسٹیبلشمنٹ کے کہنے پر دائر کی، یہ بھی درست نہیں ہے کہ بشریٰ بی بی نے عدت پوری کرنے کے بعد نکاح کیا۔ جرح کے دوران خاور مانیکا آبدیدہ ہوگئے۔
بعد ازاں بشریٰ بی بی کے سابق شوہر خاور مانیکا نے کہا ہے کہ عمران خان ایک شیطان شخص ہے۔اس نے میرا ہنستا بستا گھر تباہ کردیا، بشریٰ کی بے وفائی سے میری ایک بیٹی کو طلاق ہوگئی، ایک بیٹا ذہنی دبائو کا شکار اور ری ہیبلیٹیشن سنٹر میں زیر علاج ہے۔ انھوں نے عمران خان کے دور حکومت میں کوئی فائدہ نہیں اٹھایا۔ فرح گوگی اور بشریٰ بی بی نے سارا صوبہ پنجاب سنبھال رکھا تھا۔
انہوں نے مزید کہا کہ عمران خان، فرح گوگی اور بشریٰ بی بی کی بہن مریم کے ذریعے ہمارے گھر آیا۔ دونوں کے درمیان ناجائز تعلقات 2014 کے دھرنے سے شروع ہوئے۔ سب سے پہلے بطور مرید دم کرانے آیا تھا۔ میں بے بس تھا اس لئے خاموش رہا۔ تاہم اب میں اپنے بچوں کیلئے خاموش نہیں رہونگا۔ حقائق سامنے لا کر رہونگا۔
