پی سی بی نے پی ایس ایل سیزن 11 کی تاریخوں کا اعلان کردیا
چیئرمین پی سی بی محسن نقوی نے پی ایس ایل گیارہ کی تاریخوں کا اعلان کردیا۔
نیو یارک میں پی ایس ایل کے روڈ شو سے خطاب کرتے ہوئے چیئرمین پاکستان کرکٹ بورڈ محسن نقوی نے کہا کہ پاکستان سپر لیگ میں شامل کی جانے والی دو نئی ٹیموں کی بڈنگ 22 دسمبر کو ہوگی، جب کہ پی ایس ایل کا گیارھواں ایڈیشن 26 مارچ سے شروع کیا جائے گا اور ایونٹ کا فائنل 3 مئی کو کھیلا جائےگا۔
چیئرمین پی سی بی محسن نقوی نے کہاکہ پی ایس ایل کو مزید بہتر بنانے کےلیے بھرپور کوششیں جاری ہیں اور پاکستان کرکٹ کا مستقبل انتہائی روشن دکھائی دیتاہے۔
محسن نقوی نے کہاکہ پی ایس ایل کو دنیا کی نمبر ون لیگ بنانا بورڈ کا ہدف ہے۔
چیئرمین پاکستان کرکٹ بورڈ نے واضح کیا کہ نئی ٹیموں کی بڈنگ کا تمام عمل مکمل شفاف ہوگا اور اسے براہ راست نشر بھی کیاجائے گا۔
یاد رہے کہ انگلینڈ میں کامیاب روڈ شو کے بعد امریکا میں بھی پی ایس ایل کا تعارفی پروگرام منعقد کیا گیا، اس روڈ شو میں قومی مینز ٹیم کے 6 کھلاڑی شریک ہوئے جن میں شان مسعود، سلمان علی آغا، صائم ایوب، ابرار احمد، فہیم اشرف اور سعود شکیل شامل تھے۔تقریب کے دوران چیئرمین پی سی بی اور سابق کرکٹرز کے درمیان پینل ڈسکشن بھی ہوئی۔
