پشاور ایف سی ہیڈکوارٹر حملہ: تینوں ہلاک دہشت گردوں کی شناخت مکمل کر لی گئی

پشاور میں فیڈرل کانسٹیبلری کے ہیڈکوارٹر پر دہشتگردوں کا حملہ سیکیورٹی اہلکاروں نے ناکام بنا دیا۔

سی سی پی او پشاور ڈاکٹر میاں سعید کے مطابق حملہ صبح 8 بج کر 10 منٹ پر ہوا، جس کے بعد سنہری مسجد روڈ کو ہر طرح کی ٹریفک کے لیے بند کر دیا گیا اور گاڑیوں کا رخ صدر روڈ کی جانب موڑ دیا گیا۔

 ایک خودکش بمبار نے گیٹ پر خود کو دھماکے سے اُڑا لیا، جس کے فوراً بعد دو مزید حملہ آور اندر داخل ہونے کی کوشش میں تھے، تاہم فورسز نے بروقت کارروائی کرتے ہوئے حملہ ناکام بنا دیا۔

ابتدائی تحقیقات کے دوران سی سی ٹی وی فوٹیج بھی حاصل کی گئی، جس میں دکھایا گیا ہے کہ خودکش بمبار نے گیٹ کے باہر دھماکا کیا۔ سکیورٹی ذرائع کے مطابق ہلاک شدہ تینوں دہشت گرد افغان شہری تھے، جن کے قبضے سے ہتھیار اور گولہ بارود بھی برآمد ہوا ہے۔

اس واقعے میں ایف سی کے 3 اہلکار شہید جبکہ 2 زخمی ہو گئے۔ دھماکے کے فوراً بعد ریسکیو ٹیمیں اور ایمبولینسز علاقے میں پہنچ گئیں اور زخمیوں کو ہسپتال منتقل کیا گیا۔

ابتدائی معلومات ایس پی کینٹ نے فراہم کیں، جن کے مطابق دھماکے کے بعد علاقے کو مکمل طور پر گھیرے میں لیا گیا تھا اور پولیس، ایلیٹ فورس سمیت دیگر اداروں کو طلب کیا گیاتھا ۔ انتظامیہ نے کینٹ روڈ اور ملحقہ علاقوں کو عام آمدورفت کے لیے بند کر دیا تھا جبکہ شہر میں بی آر ٹی سروس بھی روک دی گئی تھی ۔

ریسکیو 1122 نے بتایا کہ جائے وقوع پر 6 ایمبولینسز، فائر وہیکل، ڈیزاسٹر وہیکل اور 50 سے زائد اہلکار نے حصہ لیا۔ طبی حکام کے مطابق 11 زخمیوں کو ایل آر ایچ منتقل کیا گیا—جن میں ایف سی اہلکار اور عام شہری دونوں شامل ہیں—اور اسپتال میں ایمرجنسی نافذ کر دی گئی ہے۔

آئی جی خیبر پختونخوا نے تصدیق کی کہ حملے میں شامل تینوں دہشت گرد مارے جا چکے ہیں، جبکہ سی سی پی او کے مطابق کلیئرنس آپریشن جاری ہے۔ سکیورٹی ذرائع کے مطابق دہشت گردوں نے صبح تقریباً 8 بجے کوہاٹ روڈ پر ایف سی ہیڈکوارٹر کو نشانہ بنانے کی ناکام کوشش کی۔

صدر آصف علی زرداری، وزیراعظم شہباز شریف اور وزیر داخلہ محسن نقوی نے حملے کی شدید مذمت کرتے ہوئے شہدا کے اہل خانہ سے تعزیت کی اور زخمیوں کی جلد صحت یابی کی دعا کی۔

صدر نے کہا کہ یہ کارروائی بیرونی حمایت یافتہ دہشت گردوں کی بزدلانہ کوشش ہے اور خوارج کے فتنوں کے مکمل خاتمے کو اولین ترجیح قرار دیا۔

وزیراعظم شہباز شریف نے سکیورٹی فورسز کی بروقت کارروائی کی تعریف کرتے ہوئے کہا کہ بڑے نقصان سے بچا لیا گیا۔ انہوں نے ہدایت کی کہ زخمیوں کو بہترین طبی سہولتیں دی جائیں اور دہشت گردوں کے سہولت کاروں کو قانون کے شکنجے میں لایا جائے۔

وزیر داخلہ محسن نقوی نے کہا کہ ایف سی کے جوانوں نے بہادری سے دہشت گردوں کی کوشش ناکام بنائی اور ان کی جرات کو سلام پیش کیا۔