پی ٹی آئی کے نام نہاد انقلابیوں کے حوصلے کیوں ٹوٹنے لگے؟
سینئر صحافی نصرت جاوید کا کہنا ہے کہ عاشقان عمران مصر ہیں کہ 8فروری 2024ءکے دن انہوں نے سوشل میڈیا کی بدولت پیغام رسانی کی صلاحیت کو انتہائی لگن اور مہارت سے استعمال کیا تھا۔ ان کی کاوشوں سے انتخابی نشان سے محروم ہوئی تحریک انصاف کے حمایت یافتہ امیدواروں کے انتخابی نشانات ان کے حلقوں میں موجود تحریک انصاف کے ووٹروں کو بخوبی یاد رہے۔ روز انتخاب ان کی اکثریت نے امیدوار کی بھیجی ٹرانسپورٹ کا انتظار بھی نہیں کیا۔ ازخود گھروں سے نکلے اور خاموشی سے اپنی پسند کے امیدوار کی حمایت میں بیلٹ باکس پر ٹھپہ لگا کر گھر لوٹ آئے۔ مگر رات گزر جانے کے بعد 9 فروری کی صبح سے فارم 45 یا 47 کا قضیہ شروع ہوگیا۔ اس قضیے کے ہوتے ہوئے تحریک انصاف ضمنی انتخابات میں حصہ لینے کے لئے جان کھپانے سے گریز پر مجبور ہے۔
نصرت جاوید کے مطابق کسی بھی سیاسی جماعت کے لئے اہم ترین اس کا بیانیہ اور بیانیے کے کلیدی نکات ہوتے ہیں۔ انہیں مسلسل اجاگر کرنا لازمی ہے۔ 8 فروری 2024ء کی شام سے تحریک انصاف کا کلیدی نکتہ یہ ہے کہ اس کے حمایت یافتہ امیدوار بھاری اکثریت سے اسمبلیوں کے لئے منتخب ہوئے تھے۔ ان کے پاس موجود فارم 45 اس دعویٰ کو مستند ٹھہراتے ہیں۔ فارم 47 نے مگر اقتدار موجودہ حکومت کے سپرد کر دیا۔
نصرت جاوید کے بقول فارم 45 اور فارم 47 کے مابین حقیقی یا زور زبردستی مسلط کیا ’’تفاوت‘‘ عدالتی عمل کی بدولت ہی ثابت کیا جاسکتا ہے۔ یہ عمل عوام کی نگاہوں سے اکثر اوجھل رہتا ہے۔ کسی ایک حلقے میں ہارا ہوا امیدوار اور اس کا وکیل ہی اس مدعے پر ہوئی پیش رفت کو تیز تر بنانے کو بے چین رہتا ہے۔ اس کے علاوہ حتمی فیصلہ سازی کا تمام تر بوجھ بھی عدلیہ کے کندھوں پر منتقل ہوجاتا ہے۔ عوام کی اکثریت چند مخصوص حلقوں سے آئے نتائج پر اٹھائے سوالات کے بارے میں ہوئی عدالتی کارروائی سے عموماَ بے خبر و لاتعلق ہی رہتی ہے۔
پنجاب حکومت کا عمران خان پر مزید مقدمات بنانے کا اعلان
نصرت جاوید کا مزید کہنا ہے کہ اس کے برعکس ضمنی انتخابات کسی سیاسی جماعت کو سیاسی اعتبار سے متحرک رکھنے میں بے تحاشہ مواقع فراہم کرتے ہیں۔ ان پر توجہ دیتے ہوئے تحریک انصاف اپنے اس دعویٰ کو ثابت کرنے میں کامیاب ہو سکتی ہے کہ نام نہاد فارم 47 کے ذریعے 8فروری 2024ء کے روز اس سے ’’جیت‘‘ چرا کر فارم 45 کی بدولت ہارے ہوئے لوگوں کے حوالے کردی گئی۔نصرت جاوید کے مطابق تحریک انصاف کو اپنا یہ دعویٰ ثابت کرنے کے لئے ہر ضمنی انتخاب میں متحرک ہونے کی ضرورت بھی نہیں تھی۔ مثال کے طور پر چند ہفتے قبل لاہور میں قومی اسمبلی کی ایک نشست پر ضمنی انتخاب ہوا جسے پنجاب کی وزیر اعلیٰ مریم نواز شریف صاحبہ نے صوبائی اسمبلی کی نشست اپنے پاس رکھتے ہوئے خالی کیا تھا۔ جن دیگر حلقوں میں اس روز ضمنی انتخاب ہو رہے تھے انہیں کاملاَ نظرانداز کرتے ہوئے تحریک انصاف اگر لاہور کے فقط اس حلقے سے اپنا حمایت یافتہ امیدوار جتوانے پر تمام تر توجہ مرکوز کر دیتی تو سیاسی اعتبار سے ’’رونق‘‘ لگ جاتی۔ حکومت کے لئے اس ایک حلقے پر میڈیا کے فوکس کی وجہ سے اپنا ’’اثر و رسوخ‘‘بے دریغ انداز میں استعمال کرنا بھی تقریباَ ناممکن ہوجاتا ہے۔ تحریک انصاف قومی اسمبلی کی وہ سیٹ ضمنی انتخاب کے ذریعے جیت جاتی تو اس کی فارم 47 والی کہانی کو ٹھوس مثال فراہم ہوجاتی۔ ہار کی صورت میں ’’کم تر مارجن‘‘ بھی اسے ایک توانا اپوزیشن جماعت کے طور پر اپنا وجود منوانے میں مددگار ثابت ہوتا۔ تحریک انصاف نے مگر اس ضمنی انتخاب پر توجہ ہی نہ دی اور مسلم لیگ (نون) کے نامزد کردہ امیدوار نے اسے بآسانی چت کر دیا۔
نصرت جاوید کے بقول امید تھی کہ اتوار کے روز ملتان میں ہوئے ضمنی انتخاب کو تحریک انصاف لاہور کے برعکس سنجیدگی سے لے گی۔ 8 فروری کے دن ہوئے انتخاب کے انجام پر سابق وزیر اعظم یوسف رضا گیلانی اس نشست پر بے شمار اعتراضات اور ری کاؤنٹنگ کے باوجود صرف 103ووٹوں کی اکثریت سے جیت پائے تھے۔ ان کی ایسے نمبروں سے جیت فارم 47 والی کہانی کو تقویت پہنچانے میں کلیدی مثال کی صورت بنا کر پیش ہوئی۔ منتخب ہو جانے کے بعد مگر گیلانی صاحب نے اس نشست کو سینٹ کا چیئرمین منتخب ہونے کی خواہش میں خالی کردیا۔ خالی ہوئی نشست پر اپنے ایک اور فرزند کو بطور امیدوار نامزد کر دیا۔ تحریک انصاف اس حلقے میں ہونے والے ضمنی انتخاب پر توجہ مرکوز رکھتے ہوئے گیلانی خاندان کو دیوار سے لگا سکتی تھی کیونکہ عاشقان عمران کی اکثریت ’’موروثی سیاست‘‘ سے نفرت کرتی ہے۔ ملتان سے والد کی چھوڑی نشست سے بیٹے کا انتخاب ’’موروثی سیاست‘‘ کی اہم ترین مثال بنا کر پیش کی جا سکتی تھی۔ تحریک انصاف مگر اسے روکنے کو شدت سے متحرک نظر نہیں آئی۔
نصرت جاوید کے بقول تحریک انصاف اب تنہا نہیں ہے۔ آئین کے تحفظ کے لئے اس نے اب چار دیگر جماعتوں سے اتحاد بھی بنالیا ہے۔ بلوچستان کے ایک قد آور رہ نما محمود خان اچکزئی مذکورہ اتحاد کے سربراہ ہیں جس میں سنی اتحاد کونسل اور مجلس وحدت المسلمین کے علاوہ بلوچستان کے اختر مینگل کی جماعت بی این پی بھی شامل ہے۔ مذکورہ اتحاد اور اس کے قائدین نے مگر گیلانی خاندان کو ہر صورت ضمنی انتخاب میں ہروانے کے لئے ملتان میں ’’خیمہ‘‘ لگانے سے گریز کیا۔ تحریک انصاف کے نامزد کردہ تیمور ملک یہ انتخاب تقریباَ تنہا ہی لڑتے نظر آئے۔ ان کی کاوشوں کو تحریک انصاف کے سوشل میڈیا دلاوروں نے بھی مناسب انداز میں پروجیکٹ نہیں کیا۔ بالآخر جو نتیجہ برآمد ہوا وہ یوسف رضا گیلانی کے فرزند کو اپنے مد مقابل سے تقریباَ 35 ہزار ووٹوں کی اکثریت سے کامیاب ہوگئے اور اس حلقے میں فارم 45 اور فارم 47 کی تکرار بھی نہیں ہوئی۔
نصرت جاوید کے مطابق پی ٹی آئی قیادت کو یاد رکھنا چاہیے کہ بے شمار مشکلات میں گھرے عوام کی یادداشت سیاسی موضوعات کے بارے میں بہت کمزور ہوتی ہے۔ تحریک انصاف اگر ضمنی انتخاب کے ساتھ بے اعتنائی کا رویہ برقرار رکھے گی تو عوام کی اکثریت فارم 47 والی کہانی کو بتدریج بھولنا شروع ہو جائے گی۔ 8 فروری 2024ء کا دن سیلاب کی طرح آیا اور گزر گیا محسوس ہونا شروع ہو جائے گا۔
