پی ٹی آئی کے مطالبات ناجائز،عوام احتجاج پرکان نہیں دھریں گے،عطاتارڑ
وفاقی وزیر اطلاعات عطااللہ تارڑ کاکہناہے کہ پی ٹی آئی کے مطالبات ناجائز ہیں، عوام ان کی جانب سے دی گئی احتجاج کی کسی کال پر کان نہیں دھریں گے۔
وزیر اطلاعات عطا اللہ تارڑ کا نجی ٹی وی سے گفتگو میں کہنا تھا کہ پیپلزپارٹی سے مسلم لیگ ن کو کوئی خطرہ نہیں، حکومت اپنی آئینی مدت پوری کرےگی۔پیپلزپارٹی کے تحفظات پر بات ہوتی ہے، اور ہم ان کی بات سن کر معاملے کو حل بھی کردیتے ہیں۔
عطااللہ تارڑ نے کہاکہ اپوزیشن صرف احتجاج کی سیاست کرنا چاہتی ہے، ملک اس وقت ترقی کی راہ پر گامزن ہے اور ان کے پاس اپنی سیاست چمکانے کے لیے کوئی ایشو نہیں۔وزیراعظم سے استعفیٰ مانگنے والی تحریک انصاف بتائے کہ کیا شہباز شریف ملکی معیشت بہتر ہونے پر استعفیٰ دیں، کیا وہ اسٹاک مارکیٹ اوپر جانے پر مستعفی ہوں۔
وفاقی وزیر عطااللہ تارڑ نے کہاکہ ہمیں عوام نے 5 سال کے لیے مینڈیٹ دیا ہے، اپنی آئینی مدت پوری کریں گے۔انہوں نے کہاکہ خیبرپختونخوا میں 11 سال سے تحریک انصاف کی حکومت ہے، کوئی ایک منصوبہ ایسا بتا دیا جائے جو عوام کی فلاح و بہبود کے لیے لگایا گیا ہو۔
وزیر اطلاعات نے کہاکہ ہم خیبرپختونخوا حکومت سے جہاں ضروری ہو تعاون کرتے ہیں لیکن علی امین گنڈاپور کہتے ہیں کہ انہیں مینڈیٹ ہی سیاست کرنے کا ملا ہے تعمیر و ترقی کے لیے نہیں۔مولانا فضل الرحمان انتہائی مدبر سیاست ہیں، وہ کبھی بھی ملکی مفاد کے خلاف سیاست نہیں کرتے۔وزیراعظم سے استعفیٰ مانگنے کے بجائے تحریک انصاف کی صوبائی حکومت کو مستعفی ہونا چاہیے جو عوام کے لیے کوئی منصوبہ شروع نہیں کرسکی۔
عطا تارڑ نے مزید کہاکہ عمران خان کو جیل میں جو سہولتیں میسر ہیں اس سے قبل کسی کو نہیں ملی، جیل میں ملاقاتیں جیل مینول کے مطابق ہوتی ہیں۔
