پی ٹی وی نے پریزیڈنٹ ٹرافی گریڈ ون کرکٹ ٹورنامنٹ کا ٹائٹل اپنے نام کر لیا
پاکستان ٹیلی ویژن نیٹ ورک (پی ٹی وی)نےپریزیڈنٹ ٹرافی گریڈ ون کرکٹ ٹورنامنٹ کا ٹائٹل جیت لیا۔
جمعہ کو فاتح ٹیم نے فیصلہ کن معرکےمیں اسٹیٹ بینک کو دلچسپ مقابلے کےبعد 3 وکٹوں سے ہرایا۔ شامل حسین نے نصف سنچری اسکور کی۔
راولپنڈی کرکٹ اسٹیڈیم میں کھیلے گئےپنک بال نائٹ فائنل میں پی ٹی وی کو جیت کےلیے 153 رنز کا ہدف ملا جو اس نے 7 وکٹوں کے نقصان پر حاصل کر لیا۔
شامل حسین جوگزشتہ روز 44 رنز پر ناٹ آؤٹ تھے 7 چوکوں کی مدد سے 58 رنز بنا کر آؤٹ ہو گئے۔ شامل حسین اس ٹورنامنٹ میں ایک ڈبل سنچری ، ایک سنچری اوردو نصف سنچریاں بنانے میں کامیاب رہے۔ وہ سب سے زیادہ رنز بنانے والے بیٹرز میں واپڈا کےایاز تصور کے بعد دوسرےنمبر پر رہے جبکہ پی ٹی وی کے محمد شہزاد اور وقار حسین سب سے زیادہ رنز بنانے والے بیٹرزمیں تیسرے اور چوتھے نمبر پر رہے۔
چیمپئنز ٹرافی : بھارتی ٹیم کا فائنل کے لیے دبئی میں ٹریننگ سیشن
پی ٹی وی کے لیےہدف تک پہنچنا آسان ثابت نہ ہوا اور اس کی 137 کےمجموعی اسکور پر 7 وکٹیں گر گئیں۔وقار حسین صفر، محمد محسن 19، تیمور خان 10، محمد طحہٰ 15 اور محمد شہزاد ایک رن بنا کر آؤٹ ہو گئے۔
اس موقع پر کپتان عماد بٹ نےذمہ دارانہ بیٹنگ کرتےہوئے 2 چوکوں کی مدد سے ناقابل شکست 27 رنز بنا کر اپنی ٹیم کی جیت ممکن بنا دی۔
عماد بٹ نےاس سیزن میں بحیثیت کپتان یہ دوسرا ٹورنامنٹ جیتا ہے۔ اس سے قبل ان کی قیادت میں سیالکوٹ نے قائد اعظم ٹرافی کا ٹائٹل اپنے نام کیا تھا۔
اسٹیٹ بینک کی طرف سےکاشف بھٹی نے 4 اور محمد عباس نے 2 وکٹیں حاصل کیں۔ وکٹ کیپر غازی غوری نے 3 کیچز کے علاوہ ایک اسٹمپڈ کیا۔ وہ اس ٹورنامنٹ میں کے آر ایل کےسعد بیگ کےبعد دوسرےسب سےکامیاب وکٹ کیپر رہے۔
پی ٹی وی کوٹورنامنٹ جیتنے پر 50 لاکھ روپے کی انعامی رقم ملی جبکہ رنراپ اسٹیٹ بینک نے 25 لاکھ روپے کی انعامی رقم حاصل کی۔
