روبوٹس ایک دوسرے کیساتھ باکسنگ کا مقابلہ کرنے کیلئے تیار

دنیا میں پہلی بار 2 روبوٹس ایک دوسرے کیساتھ باکسنگ کا مقابلہ کرنے کیلئے تیار ہو گئے۔

ویسے تو ابھی باکسنگ میچ صرف 2 انسانوں کے درمیان ہی ہوتے ہیں۔ مگر اب دنیا میں پہلی بار 2 روبوٹس باکسنگ رنگ میں ایک دوسرے سے مقابلہ کریں گے۔ جی ہاں واقعی چینی روبوٹیکس کمپنی یونی ٹری کی جانب سے دنیا کے پہلے روبوٹس باکسنگ میچ کو لائیو اسٹریم کرنے کا اعلان کیا گیا ہے۔ اس مقابلے کو یونی ٹری آئرن فسٹ کنگ کا نام دیا گیا ہے جو اگلے مہینے مئی میں ہوگا۔ کمپنی کی جانب سے ایک پروموشنل ویڈیو جاری کی گئی ہے جس میں دکھایا گیا ہے کہ روبوٹس ایک انسان اور دیگر روبوٹس کے ساتھ پریکٹس کر رہے ہیں۔

البتہ کمپنی کی جانب سے اس مقابلے کے حوالے سے دیگر تفصیلات جیسے روبوٹس ماڈلز کو فی الحال ظاہر نہیں کیا گیا۔مگر زیادہ امکان یہی ہے کہ کمپنی کی جانب سے یونی ٹری جی 1 روبوٹس کو استعمال کیا جائے گا جو کہ 4.3 فٹ لمبے ہیں۔ویسے اس کمپنی کے ایچ 1 روبوٹس بھی استعمال کیے جاسکتے ہیں جن کا قد 5 فٹ 11 انچ ہے۔