احدرضامیر کینیڈا سے پاکستان واپس کیوں منتقل ہوئے؟

پاکستان کے مایہ ناز سپر اسٹار احد رضا میر کا کہنا ہے کہ وہ کینیڈا سے واپس پاکستان اس لیے منتقل ہوئے کیوں کہ انہیں وہاں کے ڈراموں میں پاکستانی ہونے کی وجہ سے دہشت گرد کے مخصوص کردار دیے جاتے تھے۔
ایک انٹرویو میں انہوں نے اپنی زندگی کے بارے میں گفتگو کی اور شوبز میں آنے اور انڈسٹری میں اقربا پروری کے حوالے سے بھی کھل کر بات کی۔ احد رضا میر پاکستان کے معروف اداکار آصف رضا میر کے صاحب زادے ہیں جن کی پچھلے برس معروف اداکارہ سجل علی سے شادی ہوئی۔ یاد رہے کہ دنیا بھر کی شوبز انڈسٹری میں اقربا پروری پر بات ہوتی آئی ہے اور وقتاً فوقتاً پاکستانی شوبز انڈسٹری میں بھی اس کی بازگشت سنائی دیتی ہے۔
پاکستانی شوبز انڈسٹری میں بھی کئی ایسے ستارے ہیں جن کا تعلق شوبز گھرانوں سے ہے اور ایسے ہی ستاروں میں مقبول اداکار احد رضا میر بھی ہیں۔ تاہم احد رضا میر کہتے ہیں کہ یہ کہنا بالکل غلط ہے کہ ایک بڑے اداکار کا بیٹا بھی اداکار ہی بنتا ہے، کیوں کہ اسے والد کی وجہ سے موقع ملتا ہے۔ احد رضا میر نے دلیل دی کہ جس طرح کسی فوجی کا بیٹا فوجی اور سیاستدان کا بیٹا سیاستدان بنتا ہے، اسی طرح بعض اوقات اداکار کا بیٹا بھی اداکار بنتا ہے۔
احد رضا میر کا کہنا تھا کہ عام طور پر لوگ شوبز خاندان سے تعلق رکھنے والے اداکار پر اس وقت ہی تنقید کرتے ہیں جب وہ کوئی اچھا کام کرکے کامیاب بن جاتا ہے۔ انہوں نے اس خیال کو غلط قرار دیا کہ وہ بھی اقربا پروری کی وجہ سے شوبز انڈسٹری میں آئے۔ احد رضا میر کا کہنا تھا کہ اس میں کوئی شک نہیں کہ ان کے والد بھی اداکار تھے تاہم انہیں شوبز میں ان کے والد کی وجہ سے کام نہیں ملا۔ ان کے مطابق انہیں تو بچپن میں یہ معلوم بھی نہیں تھا کہ ان کے والد کیا کرتے ہیں اور پھر وہ اپنی تعلیم میں مصروف ہوگئے لیکن پھر انہوں نے کینیڈا میں تھیٹر سے اداکاری کا آغاز کیا۔ احد رضا میر نے اپنی زندگی سے متعلق بتایا کہ انہوں نے اب تک کینیڈا اور پاکستان میں ایک جتنا ہی وقت گزارا ہے۔ انہوں نے کینیڈا سے پاکستان منتقل ہونے کے سوال پر بتایا کہ دراصل وہاں انہیں بڑے کردار نہیں دیے جا رہے تھے اور انہیں مخصوص قسم کے کردار دیے جاتے تھے۔ انہوں نے بتایا کہ انہیں ان کی براون رنگت کی وجہ سے دہشت گردوں کے کردار سمیت صرف ایشیائی کردار دیے جاتے تھے، جس وجہ سے انہوں نے پاکستان واپس منتقل ہونے کا فیصلہ کیا۔ انہوں نے یہ بھی کہا کہ پاکستان میں ان کی جڑیں تھیں اور یہ ملک ان کے آباؤ اجداد کا ہے، اس لیے بھی وہ کینیڈا سے یہاں منتقل ہوئے اور انہوں نے یہاں شوبز میں محنت کی۔
احد رضا میر نے اپنی زندگی کے اب تک کے بہترین لمحات کو بیان کرتے ہوئے کہا کہ ان کا سجل سے شادی کرنا اور اپنے خاندان کے ساتھ وقت گزارنا اب تک کے بہترین لمحات ہیں۔زندگی کے بدترین لمحے سے متعلق بات کرتے ہوئے احد رضا میر نے بتایا کہ جب وہ کینیڈا میں تھے تو ان کے ایک دوست کا 22 سال کی عمر میں انتقال ہوگیا تھا اور وہ ان کی زندگی کا بدترین لمحہ تھا۔