بچے کی پیدائش پروالد کوچھٹی نہ دینے پرسٹیٹ بینک پرجرمانہ عائد

وفاقی محتسب برائے انسدادِ ہراسیت نے بینک افسر کو بچے کی پیدائش پر چھٹی نہ دینے پر سٹیٹ بینک پر 5 لاکھ روپے کا جرمانہ عائد کر دیا۔

30 دن پیٹرنٹی رخصت نہ دینے پر وفاقی محتسب برائے انسدادِ ہراسیت فوزیہ وقار نے حکم دیا ہے کہ اسٹیٹ بینک جرمانے کی رقم میں سے 4 لاکھ شکایت گزار افسر سید باسط علی کو ادا کرے۔

وفاقی محتسب برائے انسداد ہراسیت نے مکمل تنخواہ کے ساتھ 30 دن کی پیٹرنٹی رخصت دینے کا بھی حکم دیا ہے۔

اسٹیٹ بینک کو میٹرنٹی اور پیٹرنٹی رخصت ایکٹ 2023ء کے تحت پالیسی بنانے کی ہدایت کی گئی ہے۔

وفاقی محتسب کا کہنا ہے کہ پیٹرنٹی رخصت سے انکار صنفی بنیاد پر ہراسمنٹ کے مترادف ہے، میٹرنٹی رخصت دینا اور پیٹرنٹی رخصت سے انکار صنفی امتیاز ہے۔

وفاقی محتسب برائے انسدادِ ہراسیت نے کہا ہے کہ بچوں کی دیکھ بھال صرف خواتین کی ذمے داری نہیں، رخصت سے انکار والدین کی مشترکہ ذمے داری اور بچے کے مفاد کو نقصان پہنچانے کے مترادف ہے۔

واضح رہے کہ بینک نے متعلقہ پالیسی موجود نہ ہونے کا کہہ کر سید باسط علی کی رخصت کی درخواست مسترد کر دی تھی۔