ٹی20 ورلڈ کپ،پاکستان اور بھارت کے کپتانوں کے درمیان پھر ہینڈ شیک نہیں ہوا
پاکستان اور بھارت کے درمیان ٹی20 ورلڈ کپ کے میچ میں آج ایک بار پھر ٹاس کے وقت دونوں کپتانوں نے ہاتھ نہیں ملایا۔
مئی 2025 کی پاک بھارت جنگ کے بعد بھارت بوکھلاہٹ کا شکار ہے، اور کھیل کے میدان میں بھی سیاست کو لے آیا ہے۔روایتی طور پر ٹاس کے وقت دونوں ٹیموں کے کپتان ہاتھ ملاتے ہیں، اور پھر میچ ختم ہونے کے بعد دونوں ٹیموں کے کھلاڑیوں میں بھی ہینڈ شیک ہوتا ہے۔
پاکستان اور بھارت کے درمیان ہاتھ نہ ملانے کا معاملہ سب سے پہلے گزشتہ برس ایشیا کپ میں سامنے آیا تھا، جہاں بھارتی ٹیم نے پاکستان کے ساتھ ہاتھ ملانے سے گریز کیا۔
کرکٹ کے قوانین مرتب کرنے والے ادارے ایم سی سی کے مطابق احترام، کرکٹ کی روح کا بنیادی حصہ ہے۔ نتیجہ کچھ بھی ہو، مخالف ٹیم کو مبارکباد دینا، اپنی ٹیم کی کامیابیوں کا لطف اٹھانا، امپائرز اور مخالفین کا شکریہ ادا کرنا لازمی ہے۔
ایم سی سی مزید کہتا ہے کہ کرکٹ ایک ایسا کھیل ہے جو قیادت، دوستی اور ٹیم ورک کو فروغ دیتا ہے اور مختلف قومیتوں، ثقافتوں اور مذاہب کے کھلاڑیوں کو ایک دوسرے کے قریب لاتا ہے۔ یہی وجہ ہے کہ میچ کے بعد مصافحہ محض رسم نہیں بلکہ ’کرکٹ کی روح‘ کا ایک لازمی حصہ سمجھا جاتا ہے۔
