ٹی20 ورلڈ کپ سپر 8 مرحلہ،انگلینڈ نےسری لنکا کوشکست دیدی
ٹی20 ورلڈ کپ 2026 کے سُپر ایٹ مرحلے میں گروپ 2 کے میچ میں انگلینڈ نے سری لنکا کے خلاف 146 رنز بنا کر میچ یکطرفہ شکل دے دی، اور ہوم ٹیم سری لنکا 95 رنز پر آؤٹ ہو گئی۔ انگلینڈ نے 51 رنز کے واضح مارجن سے کامیابی حاصل کی۔
پالیکلے میں کھیلے جانے والے میچ میں سری لنکا نے ٹاس جیت کر انگلینڈ کو پہلے بیٹنگ کی دعوت دی۔ مقررہ 20 اوورز میں انگلش ٹیم نے 9 وکٹوں کے نقصان پر 146 رنز بنائے، جس میں فل سالٹ نے 40 گیندوں پر 62 رنز کی شاندار اننگز کھیلی، جبکہ ول جیکس نے 21 رنز بنا کر ٹیم کو سہارا دیا۔
سری لنکا کے بولرز نے فل سالٹ کے علاوہ کسی انگلش بیٹر کو کھل کر کھیلنے کا موقع نہیں دیا۔ دنتھ ویلالاگے نے 3، مہیش تھیکشنا اور دلشن مدھوشنکا نے 2،2 وکٹیں حاصل کیں، جبکہ دشمانتھا چمیرا نے ایک وکٹ لی۔
جوابی اننگز میں سری لنکا کی ٹیم مقررہ ہدف کے تعاقب میں 95 رنز پر ڈھیر ہوگئی۔
انگلینڈ کے ول جیکس نے 3 وکٹیں حاصل کیں، جوفرا آرچر، عادل رشید اور لیام ڈاسن نے 2،2 وکٹیں حاصل کیں، جبکہ جیمی اوورٹن نے ایک وکٹ لی۔ سری لنکا کی جانب سے کپتان داسن شناکا 30 رنز بنا کر ٹاپ اسکورر رہے جبکہ کمنڈو مینڈس نے 13 رنز بنائے۔
انگلینڈ کے ول جیکس کو بہترین آل راؤنڈ پرفارمنس کے اعتراف میں میچ کا بہترین کھلاڑی قرار دیا گیا۔
واضح رہے کہ اس گروپ کا پہلا میچ پاکستان اور نیوزی لینڈ کے درمیان بارش کے سبب منسوخ ہوا تھا، جس کے بعد دونوں ٹیموں کو ایک ایک پوائنٹ دیا گیا تھا۔
