سانحہ جعفر ایکسپریس : اداروں کے خلاف پروپیگنڈا کرنے والا ملزم بنی گالا سے گرفتار
ایف آئی اے سائبر کرائم سرکل اسلام آباد نے ریاستی اداروں کے خلاف نفرت انگیز مہم چلانے والے ملزم کو گرفتار کرلیا۔
ترجمان وفاقی تحقیقاتی ادارے ( ایف آئی اے )نے بتایا کہ ریاستی اداروں کے خلاف زہر اگلنے والے ملزم کو چھاپہ مار کارروائی میں بنی گالا اسلام آباد سے گرفتار کیاگیا ہے۔
گرفتار ملزم کی شناخت حیدر سعید کے نام سےہوئی،ملزم نے سانحہ جعفر ایکسپریس کے دوران اداروں کےخلاف منفی پروپیگنڈا اور تضحیک آمیز مواد شیئر کیا،ملزم سوشل میڈیا پر کالعدم دہشت گرد تنظیموں کی حمایت اور اس کی تشہیر کرنے میں بھی ملوث پایاگیا۔
ملزم نہ صرف ریاستی اداروں کےخلاف زہر آلود مہم چلا رہا تھا،بلکہ دہشت گردوں کے حق میں اشتعال انگیز بیانات اور مواد بھی شیئر کرتا رہا،ملزم کے سوشل میڈیا اکاؤنٹس اور ڈیجیٹل شواہد قبضے میں لےکر تحقیقات کا آغاز کردیا گیا ہے۔
جوڈیشل کمپلیکس حملہ کیس : مراد سعید، حماد اظہر اور فرخ حبیب اشتہاری قرار
واضح رہےکہ بلوچستان میں جعفر ایکسپریس کے مسافروں کو یرغمال بناکر قتل کرنے کے افسوسناک واقعے کےدوران مبینہ طور پر بعض سوشل میڈیا اکاؤنٹس سے ریاستی اداروں کےخلاف پروپیگنڈا کرنے کی اطلاعات سامنے آئی تھیں، جس کےبعد حکومت نے ڈیجیٹل دہشت گردوں کےخلاف بھی سخت کارروائی کرنے کا اعلان کیا تھا۔
