مردان کے علاقے کاٹلنگ میں مرنے والے لوگ دہشت گرد تھے: رانا ثنا اللہ
وزیراعظم کے مشیر برائے سیاسی امور رانا ثنا اللہ کا کہنا ہے کہ مردان کے علاقے کاٹلنگ میں انٹیلی جنس بیسڈ آپریشن ہوا ہے اور جو ہلاکتیں ہوئی ہیں ان ہی لوگوں کی ہوئی ہے جو دہشت گرد تھے۔
مرکزی رہنما مسلم لیگ ن رانا ثنا اللہ کا کہنا تھاکہ مردان کے علاقے کاٹلنگ میں کارروائی سے متعلق زیادہ تفصیلات میرےعلم میں نہیں۔
رانا ثنا اللہ نے کہا کہ قومی سلامتی پارلیمانی کمیٹی کی بریفنگ ہوئی تھی جس میں آرمی چیف نے بات کی تھی اور وضاحت سے اس عزم کا اظہار کیا تھا کہ دہشت گردوں کے کمین گاہوں کو ختم کریں گے۔
رانا ثنا اللہ کا کہنا تھاکہ مردان کے علاقے کاٹلنگ میں انٹیلی جنس بیسڈ آپریشن ہوا ہے، وہاں پر دہشت گرد تھے، مثبت اور قابل اعتماد اطلاعات کی بنیاد پر ہوا ہے اور جو ہلاکتیں ہوئی ہیں ان ہی لوگوں کی ہوئی ہے جو دہشت گرد تھے، اگر دہشت گرد اپنے بیوی بچوں کو ساتھ رکھیں اور دہشت گردی کی تیاری کریں تو حملہ تو کیا جائےگا۔
انہوں نے کہاکہ ہمیں ایسی بات نہیں کرنی چاہیےجو دہشت گردوں کی بالواسطہ حمایت ہو،کسی بھی دہشت گرد تک پہنچنے کے لیے کسی نکتہ نظر کی کوئی اہمیت نہیں، نہ اس کی پروا کرنی چاہیے۔
مردان میں عام شہریوں کی اموات پر انکوائری کی جائے گی : علی امین گنڈاپور
دوسری جانب مردان کے علاقے کاٹلنگ شموزو میں جاں بحق 9 افراد کی نماز جنازہ سوات میں ادا کردی گئی۔
خیال رہےکہ گزشتہ روز مردان کے علاقے کاٹلنگ شموزو میں مبینہ ڈرون حملے سے ایک ہی خاندان کے 9 افراد جاں بحق ہوگئے تھے۔
