پی ٹی آئی کے تین اہم سوشل میڈیا اکاؤنٹس کا عمران خان سے تعلق ہونے کا انکشاف

پی ٹی آئی کے تین بڑے سوشل میڈیا اکاؤنٹس کا عمران خان سے تعلق ہونے کا انکشاف ہوا ہے، یہ تینوں اکاؤنٹس علیمہ خان کے ذریعے بیرون ملک سے چلائے جارہے ہیں۔

پی ٹی آئی کے تین اہم سوشل میڈیا اکاؤنٹس سے متعلق کی گئی تحقیقات میں انکشاف ہوا ہے کہ یہ سوشل میڈیا اکاؤنٹس بیرون ملک سے عمران خان کے نامزد کردہ افراد کے ذریعے چلائے جارہے ہیں۔

خیال رہے کہ مبینہ طور پر ان ہی اکاؤنٹس سے اداروں اور غیر سیاسی شخصیات کے خلاف زہریلا پروپگینڈا کیا جاتا ہے۔

ذرائع نے دعویٰ کیا ہےکہ ماضی میں نہ صرف خود عمران خان نے ایف آئی اے کے روبرو اس بات کی تصدیق کی تھی بلکہ پی ٹی آئی کےکچھ رہنماؤں (جن سے اس وقت آئی جی پولیس اسلام آباد کی سربراہی میں جے آئی ٹی تفتیش کررہی ہے) نے بھی یہی معلومات شیئر کی ہیں۔

عمران خان اور علیمہ خان کے علاوہ پی ٹی آئی کے چیئرمین بیرسٹر گوہر،سیکرٹری جنرل سلمان اکرم راجہ حتیٰ کہ پارٹی کے سیکرٹری اطلاعات شیخ وقاص اکرم سمیت کسی بھی پارٹی رہنما کا ان اکاؤنٹس کے ذریعے پھیلائے جانےوالے مواد پر کوئی اثر و رسوخ نہیں،ان اکاؤنٹس پر فالوورز کی ایک بڑی تعداد ہے۔

ذرائع کے مطابق جبران الیاس اور اظہر مشوانی بیرون ملک سے عمران خان کے سوشل میڈیا اکاؤنٹس چلارہے ہیں،جبران الیاس امریکا میں مقیم ہیں ان کے حوالے سے کہا جاتا ہےکہ وہ پی ٹی آئی کی سوشل میڈیا ٹیم کے سربراہ ہیں اور مختلف وی لاگرز اور سوشل میڈیا پر سرگرم افراد سے رابطوں میں ہیں۔

اظہر مشوانی پہلے تو پاکستان میں تھے لیکن 9 مئی کےبعد جب پی ٹی آئی کے خلاف کریک ڈاؤن شروع ہوا تو وہ برطانیہ فرار ہوگیا،یہ الزام بھی ہےکہ علیمہ خان اپنے بھائی عمران خان کی ہدایت پر پارٹی کے آفیشل سوشل میڈیا کےلیے بیانات بھیجتی ہیں۔

ان کے بارے میں کہا جاتا ہےکہ وہ جبران الیاس،اظہر مشوانی اور علی ملک نے نامی شخص کے ساتھ رابطے میں ہیں تاکہ پارٹی کا بیانیہ تشکیل دیا جاسکے اور سوشل میڈیا مہم اور دیگر پوسٹس جاری کی جاسکیں،ان پوسٹس میں سے بعض کو حکومت اور اسٹیبلشمنٹ فوج اور ملک مخالف قرار دیتی ہے۔

بتایا جاتا ہےکہ علیمہ خان کا اس وقت بیرون ملک موجود کچھ یوٹیوبرز کے ساتھ بھی رابطہ ہے، پی ٹی آئی کا سوشل میڈیا ریاست اور فوج مخالف بیانیے اور مواد پھیلانے کی وجہ سے حکام کی نظروں میں ہے،اس سے قبل بھی کچھ تحقیقات ہوچکی ہیں۔

حال ہی میں آئی جی اسلام آباد کی سربراہی میں ایک مشترکہ تحقیقاتی ٹیم (جے آئی ٹی) تشکیل دی گئی ہےتاکہ سوشل میڈیا پر پھیلنے والی بدنیتی پر مبنی مہم کے حوالے سے تحقیقات کی جا سکے۔ اطلاعات ہیں کہ جے آئی ٹی نے پی ٹی آئی کے 15؍ افراد کو نوٹس جاری کیے ہیں،ان میں سے کچھ پیش ہوچکے جب کہ کچھ نے تاحال جواب نہیں دیا۔

اویس لغاری نے مفتاح اسماعیل کے اعدادوشمارکوگمراہ کن قرار دیدیا

پی ٹی آئی کے جن لوگوں کو نوٹس جاری ہوا تھا ان میں بیرسٹر گوہر،حماد اظہر، سلمان اکرم راجہ،رؤف حسن، اسد قیصر،عون عباس اور شیخ وقاص اکرم شامل ہیں،دیگر میں فردوس شمیم نقوی،خالد خورشید خان، عالیہ حمزہ،کنول شوزب، تیمور سلیم خان،شاہ فرمان،شہباز شبیر اور میاں محمد اسلم شامل ہیں۔

جے آئی ٹی نے پی ٹی آئی کی سوشل میڈیا ٹیم کے 10 ارکان کو بھی سمن جاری کیا تھا جن میں آصف رشید،محمد ارشد، صبغت اللہ ورک،اظہر مشوانی،محمد نعمان افضل، جبران الیاس،سید سلمان رضا زیدی،ذلفی بخاری،موسیٰ ورک اور علی حسنین ملک شامل ہیں۔