یو اے ای میں ایرانی حملوں کا بہانہ بنا کر قیمتیں بڑھانے والوں کو بھاری جرمانے

متحدہ عرب امارات (یواے ای) کی حکومت نے ایرانی حملوں کے بعد بنیادی اشیاء کی قیمتوں میں بلا جواز اضافہ کرنے پر تاجروں پر 2 لاکھ درہم سے زائد کے جرمانے عائد کر دیے ہیں۔

وزارتِ معیشت و سیاحت کے مطابق خوراک کی قیمتوں میں اضافے کی اطلاعات کے بعد 7 ہزار سے زائد ریٹیلرز کا معائنہ کیا گیا، جس دوران 567 خلاف ورزیاں سامنے آئیں، جن میں زیادہ قیمتیں وصول کرنے کے واقعات شامل تھے۔

وزارت نے بتایا کہ ایرانی حملوں کے بعد بنیادی اشیاء کی طلب میں اضافے کا فائدہ اٹھا کر تاجروں، سپلائرز اور فروخت کنندگان نے بلا جواز قیمتیں بڑھائیں۔ اس کے نتیجے میں 449 انتباہات جاری کیے گئے اور مجموعی طور پر 2 لاکھ 7 ہزار 250 درہم کے جرمانے عائد کیے گئے۔

وزارت نے قیمتوں کی نگرانی بڑھانے کا اعلان کیا تاکہ اہم اشیاء کی قیمتیں مستحکم رہیں۔ خوراک جیسے خوردنی تیل، انڈے، چاول، چینی، مرغی، دالیں، روٹی اور گندم کی قیمت وزارت اور قومی کمیٹی کی منظوری کے بغیر بڑھائی نہیں جا سکتی۔

گذشتہ دو دنوں میں پیاز اور ٹماٹر کی قیمتوں میں معمولی اضافہ دیکھا گیا، جو موجودہ خلیجی حالات کے باعث ہوا، تاہم مارکیٹ میں اضافی مقدار فراہم کی گئی ہے تاکہ سپلائی مستحکم رہے۔

وزارت نے تصدیق کی کہ یو اے ای میں بنیادی اشیاء کی کافی مقدار موجود ہے اور کسی قسم کے قلت یا خدشات کی ضرورت نہیں ہے۔