موسمیاتی تبدیلی سے جنگ اکیلے نہیں لڑسکتے،دنیا ساتھ دے،احسن اقبال

وفاقی وزیر منصوبہ بندی و ترقیات احسن اقبال کاکہناہے کہ موسمیاتی تبدیلی سے متعلق جنگ پاکستان اکیلا نہیں لڑسکتا،دنیاپاکستان کاساتھ دے۔

ماحولیاتی تبدیلی کے حوالے سے منعقدہ بریتھ پاکستان کانفرنس سے خطاب کرتے ہوئے وفاقی وزیر احسن اقبال نے کہا کہ پاکستان ایک فیصد سے بھی کم گیسز کا اخراج کرتا ہے، تب بھی ہم موسمیاتی تبدیلی کے متاثرہ ترین ممالک میں سے ہیں۔

احسن اقبال نے کہا کہ 2سال قبل سیلاب سے ایک تہائی پاکستان متاثر ہوا۔موسمیاتی تبدیلی سے لوگوں کو صحت اور معاشی مسائل ہیں۔پاکستان اس جنگ کو اکیلا نہیں لڑسکتا، ہمیں خطے کے ممالک کی مدد چاہیے ۔

 احسن اقبال نے کہا کہ موسمیاتی تبدیلی سے لڑنے  کیلئے پالیسی مرتب کی ہے۔ہم کاربن پالیسی گرین فنانسنگ پر کام کر رہے ہیں۔موسمیاتی تبدیلی سے مقابلہ اڑان پاکستان کے مرکزی نکات میں سے ہے۔ہم اسموگ پر کنٹرول،شہری آلودگی میں کمی،پانی کی بچت،فصلوں کی باقیات کو جلانے سے روکنے پر کام کر رہے ہیں۔اسی طرح سولر، ونڈ اور ہائیڈرو پاور پر منتقلی کا کام بھی جاری ہے۔

احسن اقبال کا کہنا تھا کہ گرین انرجی اور گرین جابز پیدا کر رہے ہیں ، تاہم  کلائمیٹ چینج عالمی اتحاد کا متقاضی ہے ۔ صاف ستھرے پاکستان کے لیے ہمیں مل کر کام کرنا ہے۔