ویمنزانڈر19ٹی20ایشیاکپ،افتتاحی میچ میں پاکستان کو بھارت کے ہاتھوں شکست
ایشین کرکٹ کونسل ویمنز انڈر 19 ایشیا کپ کے گروپ اے کے پہلے میچ میں بھارت نے پاکستان کو 9 وکٹوں سے شکست دے دی۔
افتتاحی میچ میں زوفشان ایاز کی قیادت میں قومی ویمنز ٹیم نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر اسکور بورڈ پر صرف 67 رنز بنائے۔
پاکستان کی وکٹ کیپر بلے باز کومل خان 32 گیندوں پر 24 رنز بنا کر ٹاپ اسکورر رہیں۔ پاکستان کی جانب سے حریف ٹیم کی صرف ایک کھلاڑی آؤٹ ہوئی جس کی وکٹ نوجوان ویمنز بولر فاطمہ خان نے حاصل کی۔
بھارت کی جانب سے سونم یادو نے 4 اوورز میں 6 رنز دے کر 4 وکٹیں حاصل کیں جس کی بدولت بھارت کی ویمنز ٹیم نے گرین شرٹس کو انتہائی کم اسکور تک محدود رکھا۔
بھارت نے بیٹنگ کرتے ہوئے پاکستان کی جانب سے دیے گئے ہدف کو صرف 7.5 اوورز میں صرف ایک وکٹ کے نقصان پر حاصل کرلیا۔
بائیں ہاتھ کی بھارتی بلے باز جی کامینی نے 29 گیندوں پر 44 رنز کی ناقابل شکست اننگز کھیلی جس میں 4 چوکے اور 3 چھکے شامل تھے جبکہ سنیکا چاکے نے 19 رنز بنائے۔
پاکستانی پلیئنگ الیون میں فزا فیاض، ماہم انیس، کومل خان، اریشہ انصاری، رویل فرحان، ذوفشان ایاز(کیپٹن)، فاطمہ خان، روزینہ اکرم اور علیزا مختار شامل تھیں۔
بھارتی پلیئنگ الیون میں گونگاڈی ترشا، جی کاملینی، نکی پرساد (کپتان)، بھاویکا آہیرے، متھیلا ونود، وی جے جوشیتا، سونم یادو، پارونیکا سسودیا، آیوشی شکلا اور شبنم شاک شامل تھیں۔
مایوس کن شکست کےبعد اب پاکستان ٹورنامنٹ کے اپنے دوسرے میچ میں پیر کو نیپال کے خلاف میدان میں اترے گا۔ میچ مقامی وقت کے مطابق دوپہر 2 بجے شروع ہوگا۔
گروپ اے میں پاکستان کی خواتین ٹیم کے علاوہ بھارت اور نیپال جبکہ گروپ بی میں بنگلہ دیش، ملائیشیا اور سری لنکا شامل ہیں۔
6 ٹیموں پر مشتمل یہ ٹورنامنٹ ٹی20 فارمیٹ میں کھیلا جائے گا جس میں ہر گروپ کی ٹاپ2 ٹیمیں سپر 4 مرحلے میں پہنچیں گی۔
سپر فورمرحلے کےمیچز 19 اور 20 دسمبر کو کھیلے جائیں گے جبکہ فائنل 22 دسمبر کو شیڈول ہے۔
فارمیٹ کے مطابق 5 ویں اور چھٹی پوزیشن کے علاوہ تیسری اور چوتھی پوزیشن کے لیے اضافی میچز بالترتیب 18 اور 22 دسمبر کو کھیلے جائیں گے۔
