امریکی صدربائیڈن کا پہلا دورہ سعودیہ، اسرائیل سے ڈائریکٹ جدہ پہنچ گئے
امریکی صدر جوبائیڈن اسرائیل کے دورے کے بعد براہ راست سعودی عرب پہنچ گئے،امریکی صدر کا یہ صدارت سنبھالنے کے بعد سعودی عرب کا پہلا دورہ ہے۔
عالمی میڈیا رپورٹس کے مطابق اسرائیل کے دو روزہ دورے کے دوران امریکی صدر نے اسرائیلی اور فلسطینی قیادت سے ملاقات کی، امریکی صدر اسرائیلی شہر تل ابیب سے براہ راست جدہ پہنچے، وہ پہلے امریکی صدر ہیں جو اسرائیل سے براہ راست ایسے عرب ملک پہنچے ہیں جو اسرائیل کو تسلیم نہیں کرتا، جدہ پہنچنے پر گورنر مکہ شہزادہ خالد الفیصل اور امریکا میں سعودی سفیر شہزادی ریما بنت بندر نے امریکی صدر کا استقبال کیا۔
جوبائیڈن جدہ میں سعودی فرمانروا شاہ سلمان اورولی عہد محمد بن سلمان سے ملاقاتیں کریں گے، اس کے علاوہ جدہ سکیورٹی اینڈ ڈویلپمنٹ سمٹ میں بھی شرکت کریں گے جس میں بحرین، کویت، عمان، قطر اور متحدہ عرب امارات کے سربراہان شریک ہوں گے۔
قبل ازیں غیر ملکی خبر رساں ایجنسی ‘رائٹرز’ کے مطابق کہا گیا کہ امریکی صدر جو بائیڈن سعودی عرب سے تعلقات کو دوبارہ بحال کرنے، سعودی قیادت کے ساتھ توانائی کی فراہمی، انسانی حقوق اور سیکیورٹی تعاون پر تبادلہ خیال کے لیے دورہ کریں گے،یہ واضح رہے جو بائیڈن ایک ایسے ملک کے ساتھ امریکہ کے تعلقات کو دوبارہ بحالی کے لیے دورے پر ہیں جس کو انہوں نے عالمی سطح پر ‘تنہا’ کرنے کا عزم کیا تھا۔
