کبھی کسی حکومت کو اتنی نیچ حرکتیں کرتے نہیں دیکھا

مسلم لیگ ن کی نائب صدر مریم نواز نے کہا ہے کہ میرا بدلہ عوام سے مت لو، کبھی کسی حکومت کو اتنی نیچ حرکتیں کرتے نہیں دیکھا، لاہوری انہی حرکتوں کے خاتمے کےلیے باہر نکلیں گے۔
تفصیلات کے مطابق سماجی رابطوں کی ویب سائٹ ٹوئٹر پر اپنے ایک بیان میں انہوں نے کہا کہ کل لوگ مزاق میں کہہ رہے تھے کہ کرسی اور ٹینٹ سروس والوں کے بعد عمران خان اب ہوٹل والوں کے پیچھے پڑ جائے گا مگر گھبراہٹ اور خوف کا یہ عالم ہے کہ مزاق بھی حقیقت میں ڈھل گیا۔
یاد رہے کہ مسلم لیگ ن کی نائب صدر مریم نواز کی گزشتہ روز نکالی جانے والی ریلی کے خلاف لاہور کے تین مختلف تھانوں میں مقدمات درج کر لیے گئے ہیں، تفصیلات کے مطابق مریم نواز کی جانب سے ریلی نکالنے جانے پر اچھرہ، گوالمنڈی اور لوہاری تھانے میں مقدمات درج کر لیے گئے جس میں کورونا ایس او پیز کی خلاف ورزی، روڈ بلاک، اشتعال انگیز تقاریر کی دفعات شامل ہیں ان مقدمات میں سینکڑوں لیگی کارکنوں کو نامزد کیا گیا ہے ، کورونا ایس او پیز کی خلاف ورزی کے الزام میں مریم نواز نے جس ہوٹل میں کھانا کھایا اُس کے خلاف بھی مقدمہ درج کر لیا گیا ہے،
خیال رہے کہ گزشتہ روز پی ڈی ایم کے 13 دسمبر کے مینار پاکستان کے جلسے میں عوام کو شرکت کی دعوت دینے کی مناسبت سے پاکستان مسلم لیگ ن کی مرکزی رہنما مریم نواز کی قیادت میں گجومتہ سے داتا دربار تک ریلی نکالی گئی تھی۔
ریلی سے خطاب کرتے ہوئے مسلم لیگ ن کی مرکزی نائب صدر مریم نواز نے کہا کہ مسلم لیگ ن نے ابھی تک باقاعدہ طور پر استعفوں کا نہیں کہا لیکن میرے پاس استعفوں کے انبار لگے ہیں، مسلم لیگ ن 13دسمبر کے بعد استعفے لے گی، یہ حکومت جلد انجام کو پہنچے گی، عمران خان ہاتھ جوڑ کر پی ڈی ایم سے این آر او مانگ رہے ہیں۔ انہوں نے کہا کہ لاہور کے عوام کو کہوں گی کہ فیصلے کا وقت آگیا ہے، اس لیے لاہوریوں کو لاہور کی بیٹی مریم نواز خود جا کر 13دسمبر کے جلسے میں شرکت کی دعوت دے گی کہ وہ بار نکلیں اور جابر حکومت کے خلاف نواز شریف کا ساتھ دیں، اس ملک میں مستقبل صرف ن لیگ کا ہی ہے، کیوں کہ اس ملک کی خدمت پہلے بھی ن لیگ نے ہی کی ہے اور اب بھی وہی کرے گی، نوازشریف کا مقابلہ عمران خان سے نہیں بلکہ انہیں لانے والوں سے ہے۔