نواز الدین صدیقی بالی ووڈ میں کامیابی کے بعد ہالی ووڈ میں

بھارتی فلم انڈسٹری میں اپنی لاجواب اداکاری کا لوہا منوانے والے اداکار نواز الدین صدیقی نے انڈیا کے بعد اب امریکہ میں بھی کامیابیوں کے جھنڈے گاڑنا شروع کر دیئے ہیں، اداکار کو امریکی فلم ‘لکشمن لوپیز’ Laxman Lopez کے ذریعے خود کو ہالی ووڈ میں منوانے کا موقع مل گیا ہے، خاص بات یہ ہے کہ نواز الدین صدیقی فلم میں مرکزی کردار نبھاتے دکھائی دیں گے۔ فلم لکشمن لوپیز کرسمس تھیم پر مبنی ہے، جو رواں سال کے آخر میں نمائش کے لیے پیش کردی جائے گی، فلم ہالی ووڈ کے مشہور رابرٹو گیرالٹ کی ہدایتکاری میں بنائی جائے گی۔
اس فلم کے ہدایت کار رابرٹو گیرالٹ نے بتایا کہ جب پہلی بار میں نے سکرپٹ پڑھا، تو لکشمن لوپیز کی تلاش شروع کر دی، میرا دماغ اس دوران نواز الدین کی طرف چلا گیا، میں نے اُن کا کچھ کام دیکھ رکھا تھا، میں جانتا ہوں وہ اس کردار کے غیر معروف اور کمزور پہلو ضرور سامنے لائیں گے۔ ان دنوں کانز فلم فیسٹول میں شرکت کرنے والے نواز الدین صدیقی بھی امریکی فلم میں مرکزی کردار ملنے پر خوش ہیں، اداکار کے مطابق میرے لیے یہ زبردست چیلنج ہے، جس کی مجھ میں تڑپ تھی۔ بالی ووڈ سٹار سے جب پوچھا گیا کہ فوری طور پر پروجیکٹ کے لیے ہاں کیوں کہی؟ تو بتایا کہ فلم کی کہانی بتانے کے دوران وہ متعدد بار پرجوش ہوگئے، کرسمس سے متعلق فلم میں کام کرنے کا موقع بہت ہی مختلف ہوتا ہے، یہی وجہ ہے کہ میری توجہ فوراً پر مبذول ہوگئی اور میں نے ہاں کر دی۔نواز الدین صدیقی نے یہ بھی کہا کہ رابرٹو گیرالٹ اپنی ہدایت کاری اور کیمرے کی طاقت سے کچھ نئے پہلوؤں کو روشناس کرانا چاہتے ہیں، ایک اداکار کے لیے یہ زبردست چیلنج ہے، جس کی اُس میں تڑپ ہوتی ہے، سب سے اہم بات یہ ہے کہ لکشمن لوپیز کے نام نے بھی مجھ میں تجسس پیداکردیا ہے۔
دنیا بھر میں موجود اداکار کےمداح بھی اپنےاسٹار کوہالی ووڈفلم میں مرکزی کردار ملنے پر خوش ہیں اور بےصبری سے فلم کا انتظار کر رہے ہیں، مداحوں کو جیسے ہی یہ خبر ملی انہوں نے اس پر ردعمل دیتے ہوئے سوشل میڈیا پر تبصرے شروع کردیے۔ ایک مداح نے کہا کہ نواز ایک لاجواب اداکار ہے، جس نے حالیہ برس میں کئی زبردست کردار ادا کیے، مجھے امید ہے وہ چیزیں بدل دیں گے، ایک اور مداح نے کہا کہ میں نواز الدین کی منٹو یا سیکرڈ گیمز جیسی اداکاری دیکھنا چاہتا ہوں، خیال رہے کہ نواز الدین صدیقی ان دنوں کانز فلم فیسٹیول میں شریک ہیں۔