اداکارہ سدرہ نیازی کا عمران خان سے کیا تعلق ہے؟

سوشل میڈیا پر اس وقت یہ سوال زیر بحث ہے کہ کیا میانوالی کے نیازی قبیلے سے تعلق رکھنے والی اداکارہ سدرہ نیازی کی عمران خان سے کوئی رشتہ داری ہے؟ صحافت سے شوبز کی چکا چوند دنیا میں قدم رکھنے والی اداکارہ سدرہ نیازی نے اس سوال کا جواب دیتے ہوئے کہا ہے کہ اکثر لوگ مجھ سے پہلا سوال یہی کرتے ہیں کہ کیا آپ عمران خان کی رشتہ دار ہیں؟ یاد رہے کہ عمران بھی نیازی قبیلے سے تعلق رکھتے ہیں اور ان کا آبائی علاقہ بھی میانوالی ہے جہاں زیادہ تر نیازی پائے جاتے ہیں، سدرہ نیازی کا آبائی علاقہ بھی میاںوالی ہے اور انکا اور عمران کا علاقہ اور قبیلہ بھی ایک ہی ہے۔
’فوچیا میگزین‘ کو دیئے گئے انٹرویو میں سدرہ نیازی نے کہا کہ نیازی قبیلہ اتنا بڑا نہیں ہے۔ ان کے بزرگ عمران خان کو اچھی طرح جانتے ہیں اور ان کی ملاقاتیں بھی ہوتی رہی ہیں مگر تحریک انصاف کے چیئرمین ان کے قریبی رشتہ دار نہیں ہیں۔
اداکارہ نے بتایا کہ ان کے والدین میانوالی سے تعلق رکھتے ہیں مگر ان کی پیدائش لاہور میں ہوئی اور وہیں سے انہوں نے اپنے شوہر کیریئر کا آغاز کیا، اداکارہ کے مطابق جب وہ چھوٹی تھیں تو عمران خان ان کی دادی سے ملنے آتے تھے۔ اس کے علاوہ عمران خان سدرہ نیازی کے چچا سے بھی ملتے رہتے تھے، کیونکہ وہ کالم نگار تھے۔
ایک سوال پر اداکارہ نے بتایا کہ وہ کسی شادی کی تقریب میں موجود تھیں تو عمران خان بھی وہاں چلے آئے جہاں ان کی ملاقات بھی ہوئی۔سدرہ نیازی نے حیرانگی کا اظہار کیا کہ لوگ یہ سمجھتے ہیں کہ وہ بھی نیازی ہیں اور عمران خان بھی نیازی ہیں تو یہ قریبی رشتے دار بھی ہوں گے اور وہ انہیں سپورٹ بھی کرتی ہوں گی، انہوں نے کہا کہ بطور نیازی وہ عمران کو سپورٹ نہیں کرتیں، کیونکہ ان کا ماننا ہے کہ قبیلے کی بنیاد پر کسی سیاستدان کو سپورٹ نہیں کیا جانا چاہئے۔
سدرہ نیازی کے مطابق لوگ ان سے سیاست سے متعلق بات کرتے ہوئے عمران کی غلطیوں کا ذمہ دار انہیں بھی ٹھہرانے کی کوشش کرتے ہیں، سدرہ نیازی نے بتایا کہ انہوں نے بطور کرائم رپورٹر اپنے صحافتی کیریئر کا آغاز کیا تھا اور پھر اتفاقی طور پر اداکاری کی جانب آ گئیں، ان کے مطابق انہیں ہم ٹی وی میں اسکرپٹ لکھنے کا شوق تھا اور وہ اسی کام کے لیے سلطانہ صدیقی سے ملی تھیں مگر انہوں نے انہیں اداکاری کی تجویز دی اور یوں وہ شوبز کی جانب آ گئیں۔
سدرہ نیازی نے 2020 کے آغاز میں اداکاری کی دنیا میں قدم رکھا تھا اور کم ہی وقت میں اچھی جگہ بنانے میں کامیاب ہوگئیں، اب تک سدرہ نیازی ایک درجن سے زائد ڈراموں میں کام کر چکی ہیں جبکہ وہ چند ٹیلی فلموں میں بھی اپنے فن کے جوہر دکھا چکی ہیں۔