لاہور ہائیکورٹ: مریم نواز کی بیرون ملک روانگی کی درخواست سماعت کیلے مقرر

لاہور ہائیکورٹ نے مسلم لیگ (ن) کی نائب صدر مریم نواز کی بیرون ملک جانے کی اجازت کے لیے دائر کردہ درخواستیں سماعت کے لیے مقرر کردی ہیں۔ عدالت عالیہ کا نیا دو رکنی بینچ مریم نواز کی درخواست پر 18 فروری کو سماعت کرے گا۔
بینچ کی سربراہی جسٹس علی باقر نجفی کریں گے جبکہ مریم نواز کی دو درخواستوں پر سماعت ہوگی۔
واضح رہے کہ مریم نواز کی جانب سے بیرون ملک جانے کے لیے نام ایگزٹ کنٹرول لسٹ (ای سی ایل) سے نکالنے اور پاسپورٹ کی واپسی کے لیے درخواستیں دائر کی گئی تھیں۔
یاد رہے کہ اس سے قبل مریم نواز کی درخواستوں پر سماعت جسٹس علی باقر نجفی کی سربراہی میں بینچ کر رہا تھا تاہم وہ بینچ تحلیل ہوگیا تھا جس کے بعد جسٹس طارق عباسی کی سربراہی میں دو رکنی بینچ مذکورہ معاملے پر سماعت کر رہا تھا۔
تاہم گزشتہ دنوں مذکورہ دو رکنی بینچ بھی تحلیل ہوگیا تھا جس کے بعد دوبارہ جسٹس علی باقر نجفی کی سربراہی میں جسٹس طارق سلیم شیخ پر مشتمل 2 رکنی بینچ تشکیل دیا گیا تھا۔
خیال رہے کہ ہفتہ 7 دسمبر کو سابق وزیر اعظم نواز شریف کی صاحبزادی مریم نواز نے اپنا نام ایگزٹ کنٹرول لسٹ سے نکال کر 6 ہفتوں کے لیے بیرون ملک جانے کی اجازت دینے کے لیے لاہور ہائی کورٹ سے رجوع کیا تھا۔ مریم نواز نے امجد پرویز ایڈووکیٹ کے توسط سے ہائی کورٹ میں درخواست دائر کی تھی، جس میں وزارت داخلہ، وفاقی تحقیقاتی ادارے (ایف آئی اے)، قومی احتساب بیورو (نیب) کے چیئرمین اور ڈی جی نیب لاہور کو فریق بنایا گیا تھا۔نیب پہلے ہی مریم نواز کی درخواستوں کی مخالفت کر چکا ہے۔
درخواست میں مریم نواز کی جانب سے موقف اپنایا تھا کہ العزیزیہ ریفرنس میں سزا کے باوجود بیمار والدہ کو چھوڑ کر بیرون ملک سے والد کے ساتھ واپس آئی لیکن میرا موقف سنے بغیر ہی نام ای سی ایل میں شامل کر دیا گیا۔ درخواست گزار کا کہنا تھا کہ ای سی ایل میں نام شامل کرنے کا میمورنڈرم غیر قانونی اور آئین کی خلاف ورزی ہے جبکہ نام ای سی ایل میں شامل کرنے کا میمورنڈم اعلیٰ عدلیہ کے فیصلوں کی بھی خلاف ورزی ہے۔ مریم نواز نے موقف اپنایا تھا کہ والدہ کی وفات کے بعد والد نواز شریف کی دیکھ بھال وہ ہی کرتی رہی ہیں اور وہ بیماری میں مجھ پر ہی انحصار کرتے ہیں۔ علاوہ ازیں مریم نواز نے پاسپورٹ واپس لینے کے لیے بھی لاہور ہائی کورٹ میں متفرق درخواست دائر کی تھی۔