نیم عریاں لباس پہننے والی بھارتی اداکارہ دبئی میں گرفتار
دبئی حکام نے معروف بھارتی اداکارہ اور ماڈل عرفی جاوید کو متحدہ عرب امارات کی ریاست دبئی میں نیم عریاں لباس پہن کر عوامی مقامات پر شوٹنگ کرنے پر حراست میں لے لیا ہے۔ عرفی جاوید ریاست اتر پردیش کے شہر لکھنؤ میں مسلمان گھرانے میں پیدا ہوئیں، انہیں متنازع ریئلٹی شو ’بگ باس‘ کے پہلے سیزن میں شرکت کے بعد شہرت ملی۔ عرفی اپنے لباس کی وجہ سے متنازع خیال کی جاتی ہیں اور یہی دبئی میں ان کی گرفتاری کی وجہ بھی بن گئی۔ عرفی جاوید نے اب تک ایک درجن کے قریب ٹی وی ڈراموں اور چند ویب سیریز میں کام کیا ہے، تاہم وہ سوشل میڈیا پر متحرک دکھائی دیتی ہیں۔
عرفی کے لباس کے علاوہ ان کی فیشن سینس کو بھی بھارتی روایات کے خلاف قرار دیا جاتا رہا ہے۔ دو ماہ قبل اکتوبر میں ان کی جانب سے پرانے بولی وڈ گانے ’ہائے ہائے یہ مجبوری‘ میں بولڈ لباس کے ساتھ پرفارمنس کرنے پر بھی ان کے خلاف ہندوؤں نے قانونی چارہ جوئی کی تھی اور بھارت بھر میں احتجاج کیے گئے تھے۔ لیکن اب انہیں دبئی میں ایک عوامی مقامات پر نیم عریاں لباس پہن کر شوٹنگ کرنے پر حراست میں لے لیا گیا جو کہ متحدہ عرب امارات کے قوانین کی صریحاً خلاف ورزی ہے۔
اسی حوالے سے ’ہندوستان ٹائمز‘ نے بتایا کہ عرفی جاوید کو نیم عریاں لباس پہن کر عوامی مقام پر نامناسب انداز میں جانے پر حراست میں لیا گیا ہے۔ رپورٹ میں بتایا گیا کہ دبئی میں عوامی مقامات پر نیم عریاں یا فحش لباس پہننے کی اجازت نہیں ہے اور اسی وجہ سے ہی عرفی جاوید کو حراست میں لیا گیا۔ رپورٹ کے مطابق عرفی جاوید کو دبئی پولیس نے حراست میں لے کر ان سے کئی گھنٹے تک پوچھ گچھ بھی کی اور امکان ہے کہ انہیں فوری طور پر واپس ہندوستان آنے سے بھی روکا جائے گا۔ عرفی جاوید ایک ہفتہ قبل ہی کچھ شوٹنگز کے لیے دبئی پہنچی تھیں۔ انہوں نے وہاں سے ہی انسٹاگرام پر بولڈ انداز میں تصاویر اور ویڈیوز بنا کر انسٹاگرام پر پوسٹ کی تھیں۔ خیال کیا جا رہا ہے کہ عرفی جاوید کو دبئی پولیس چند دن تک حراست میں رکھ کر ان کی دبئی میں موجودگی کے وقت کی پوری تفتیش کرنے کے بعد انہیں ضمانت پر رہا کرے گی۔
