بھارتی اداکار بھی کرونا کا شکار
بولی وڈ اداکار سنی دیول بھی عالمی وبا کی وجہ بننے والے کرونا وائرس کا شکار ہوگئے۔
سنی دیول نے سماجی رابطے کی ویب سائٹ ٹوئٹر پر کیے گئے ٹوئٹ میں انہوں نے کرونا وائرس کا ٹیسٹ مثبت آنے سے متعلق بتایا۔ انہوں نے اپنی ٹوئٹ میں مداحوں کو بتایا کہ ‘ میں نے کرونا وائرس کا ٹیسٹ کرایا اور اس کا نتیجہ مثبت آیا ہے’۔ سنی دیول نے کہا کہ میں آئسولیشن میں ہوں اور اچھا محسوس کررہا ہوں۔
मैंने कोरोना टेस्ट करवाया और रिपोर्ट पॉजिटिव आई है। मैं एकांतवास में हूं और मेरी तबीयत ठीक है। मेरा अनुरोध है कि आप में से जो भी लोग गत कुछ दिनों में मेरे संपर्क में आयें हैं, कृपया स्वयं को आइसोलेट कर अपनी जाँच करवाएं।
— Sunny Deol (@iamsunnydeol) December 2, 2020
اس کے ساتھ ہی سنی دیول نے کہا کہ وہ لوگ جو حال ہی میں ان سے رابطے میں تھے، وہ خود کو آئسولیٹ کرلیں اور اپنا ٹیسٹ کروالیں۔ خیال رہے کہ سنی دیول اپنے والد دھرمیندر، بھائی بوبی دیول اور بیٹے کرن دیول کے ساتھ فلم ‘اپنے’ کے سیکوئیل میں دکھائی دیں گے۔ بھارت اس وقت کرونا وائرس کے کیسز کے لحاظ سے دنیا میں دوسرے نمبر پر ہے، 2 دسمبر تک بھارت میں عالمی وبا سے متاثرہ افراد کی مجموعی تعداد 94 لاکھ 99 ہزار سے زائد جبکہ ہلاکتوں کی تعداد ایک لاکھ 38 ہزار سے تجاوز کرچکی تھیں۔ متعدد بولی وڈ شخصیات کرونا میں مبتلا ہوچکی تھیں تاہم تمام ہی شخصیات ایک سے ڈیڑھ ماہ کے دوران صحت یاب ہو گئیں۔ عالمی وبا سے متاثر ہونے والی بولی وڈ شخصیات میں امیتابھ بچن، ابھیشیک بچن، ایشوریا رائے، جینیلیا ڈی سوزا اور کرن کمار، آفتاب شیوداسانی سمیت دیگر شامل ہیں۔ نومبر میں سلمان خان اور ان کے والدین سمیت دیگر اہل خانہ نے ملازمین میں کرونا کی تشخیص کے بعد خود کو قرنطینہ کرلیا تھا اور سپراسٹار کے کرونا ٹیسٹ کا نتیجہ منفی آیا تھا۔
