این اے 133 جیسا الیکشن پہلے کبھی نہیں دیکھا
وفاقی وزیر داخلہ شیخ رشید نے کہا ہے کہ این اے 133 کا پہلا الیکشن دیکھا جس میں جیتنے ، ہارنے اور حصہ لینے والے تمام خوش تھے۔
شیخ رشید نے قومی سلامتی اجلاس میں شرکت کے موقع پر میڈیا سے غیر رسمی بات کرتے ہوئے کہا کہ اپوزیشن کو کل کے الیکشن سے سبق سیکھنا چاہئے جہاں انسانی ہمدردی ہو وہاں 10 فیصد ووٹ ویسے ہی کاسٹ ہو جاتے ہیں۔
انھوں نے کہا کہ شائستہ بی بی دس فیصد ووٹوں سے رکن بنی ہیں ، اگلے الیکشن سے ووٹوں کی تعداد 13 کروڑ سے تجاوز کر جائے گی ۔ ضمنی الیکشن کے بعد جیتنے والی پارٹی بھی خوش ہے، ہارنے والی اور حصہ نہ لینے والی پارٹی بھی خوش ہے، ایسا الیکشن زندگی میں نہیں دیکھا۔
وفاقی وزیر داخلہ نے کہا کہ کل کے الیکشن نے ثابت کیا ہے کہ سیاسی جماعتیں صرف میڈیا ہاوسز کے سہارے ہی زندہ رہتی ہیں ، پہلی دفعہ ایسا ہوا کہ بریانیاں اور حلوے خالی پڑے رہ گئے ، لوگوں نے منہ تک نہیں لگایا۔
شیخ رشید نے بتایا کہ سانحہ سیالکوٹ افسوسناک واقعہ ہے جس کی جتنی مذمت کی جائے کم ہے ، جب تک دہشت گردی کے خلاف پکا ہاتھ نہیں ڈالیں گے تو ایسے واقعات ہوتے رہیں گے۔
