ہانیہ عامر نے اپنی غلطیوں کی وجہ کم عمری کو قرار دیدیا

صرف 20 برس کی عمر میں شوبز انڈسٹری میں قدم رکھنے والی ہانیہ عامر نے اعتراف کیا کہ کم عمری میں شوبز دنیا میں آنے کی وجہ سے ان سے بہت ساری غلطیاں سرزد ہوئیں، ہانیہ نے 2016 میں 20 سال سے بھی کم عمری میں اداکاری کا آغاز کیا تھا۔
گزشتہ 6 سال میں وہ نصف درجن سے زائد فلموں اور ایک درجن سے زائد ڈراموں میں اداکاری کے جوہر دکھا چکی ہیں، تاہم وہ گلوکار عاصم اظہر کے ساتھ رومانوی تعلقات اور گلوکار عاشر وجاہت کے ہمراہ مزاحیہ ویڈیو وائرل ہونے کی وجہ سے تنازعات کا شکار رہیں۔ اداکارہ نے ایک انٹرویو میں کھل کر بتایا کہ وہ کیسے شوبز میں آئیں اور کس طرح چند ہی سال میں بہت ساری چیزیں سیکھیں۔ ہانیہ نے بتایا کہ جب وہ 12 سال کی تھیں تو ان کے والدین کی طلاق ہوگئی تھی اور انہوں نے اپنی تعلیم مختلف شہروں میں مکمل کی، وہ یونیورسٹی میں مزید تعلیم حاصل کرنا چاہتی تھیں مگر اسی دوران فلم ’جانان‘ کے لیے آڈیشن دیا اور فلم کے لیے منتخب ہو گئیں۔ ہانیہ عامر نے بتایا کہ انہوں نے فلم میں کام کی پیش کش قبول کرلی مگر ان کی والدہ ناراض ہوگئیں اور انہیں بہت مشکل سے کام کرنے کی اجازت ملی۔ لیکن ان کے شوبز میں آنے کے بعد ان کے ماموں سمیت دیگر رشتے داروں نے جھگڑا کیا اور انہیں کام کرنے سے روکا۔
اداکارہ کے مطابق پہلی فلم میں کام کرنے کے بعد انہوں نے ہمت کر کے والدہ کو کہا کہ وہ گھر کے اخراجات چلائیں گی اور شوبز میں کام کرتی رہیں گی، ایک سوال پر ہانیہ نے بتایا کہ پاکستانی شوبز انڈسٹری میں زیادہ تر اداکار متوسط گھرانوں سے دو وجوہات کی بنا پر آتے ہیں۔ ان کے مطابق متوسط گھرانوں سے آنے والے یا تو بڑے اداکار بننے کے شوق میں شوبز میں آتے ہیں یا پھر غربت کی وجہ سے گھر کے اخراجات چلانے کے لیے اداکاری کرتے ہیں اور محںت کرتے ہیں، ان کا کہنا تھا کہ شوبز انڈسٹری میں بہت ہی کم اداکار گھرانوں یا امیر گھرانوں کے بچے آتے ہیں۔
اداکارہ کے مطابق وہ بھی کم عمری میں شوبز کا حصہ بنیں تو ان سے بھی کئی غلطیاں ہوئیں اور غلطیوں سے ٹھوکر کھاکر ہی سبق سیکھا اور اب وہ میچور بننے لگی ہیں لیکن ممکن ہے کہ دوسرے لوگ تاحال انہیں سنجیدہ نہ لیتے ہوں۔ ہانیہ عامر نے لوگوں سے مخاطب ہوتے ہوئے کہا کہ وہ کم عمر افراد کو ان کی غلطیوں کی وجہ سے غلط نہ سمجھا کریں، کیونکہ ایسے افراد کو غلطیوں کا احساس تک نہیں ہوتا، اداکارہ کے مطابق انہوں نے بھی 19، 20 اور 22 سال کی عمر میں وہی کچھ کیا جو اس عمر کا بچہ کر سکتا ہے۔ انکا کہنا تھا کہ ایسی عمر کے شخص سے بڑی توقعات کیوں رکھی جاتی ہیں؟ ہانیہ نے تسلیم کیا کہ وہ کم عمری میں اداکاری میں آئیں اور اسی وجہ سے بچگانہ باتیں کرتی تھیں اور معاملات کو سنجیدہ لینے کے بجائے مذاق میں ٹال دیتی تھیں۔ شاید اسی وجہ سے لوگ انہیں غلط کہتے تھے اور ان کی باتوں اور اداکاری کو سنجیدہ نہیں لیتے تھے، کیوںکہ وہ انہیں بچی لگتی ہوں گی۔
ہانیہ عامر نے کہا کہ ان کی غلطیوں کی وجہ سے ان پر ٹوئٹر پر ٹرینڈ بنے اور جب ہزاروں اور لاکھوں لوگ انہیں غلط کہنے لگے تو انہیں سمجھ آئی کہ انہیں کتنے لوگ دیکھتے اور نظر میں رکھتے ہیں۔ ہانیہ عامر کے مطابق جب لاکھوں لوگ کسی کو غلط کہہ رہے ہوتے ہیں تب وہ شخص خود کو غلط سمجھنے لگتا ہے، چاہے اس نے کوئی غلطی نہ بھی کی ہو۔ اداکارہ نے دبے الفاظ میں عاصم اظہر کا نام لیے بغیر اپنے رومانوی تعلقات پر بات کی اور اعتراف کیا کہ اس معاملے میں بھی وہ غلط تھیں، کیوں کہ انہوں نے خود کو احترام اور عزت دینے کے بجائے دوسرے کو عزت اور احترام دیا۔ ہانیہ عامر نے سوشل میڈیا کے استعمال پر بھی بات کی اور لکھا کہ کم عمری کی وجہ سے ان سمیت زیادہ لوگوں کو معلوم نہیں ہوتا کہ انہیں بوائے فرینڈ کے ساتھ تصویر شیئر کرنی چاہیے یا نہیں؟ یا پھر بڑی عمر کے شخص سے کس طرح بات کی جائے؟
اداکارہ کے مطابق انہوں نے کئی غلطیاں کیں جن کی وجہ سے ٹھوکریں بھی کھائیں مگر اب وہ سمجھ چکی ہیں، ان کا کہنا تھا کہ جو بھی سینئر اداکار ہیں وہ نئی نسل کے اداکاروں کو سمجھائیں کہ فلاں چیز غلط ہے، فلاں معاملے پر اس طرح بات کرو اور اس طرح کا لباس پہنو۔ اس طرح نئے فنکار بھی ان سے سیکھیں گے اور ان کی عزت میں بھی اضافہ ہوگا۔