ٹک ٹاکر جنت مرزا نے شادی کیلئے اپنی پسند بتا دی

معروف ٹک ٹاکر جنت مرزا نے انکشاف کیا ہے کہ سوشل میڈیا پر ان کی کامیابی میں والدین کا کلیدی کردار ہے، ان کی اجازت کے بغیر میں یہاں تک نہیں پہن سکتی تھی، اب ان کی پسند سے ہی شادی کروں گی۔

ٹک ٹاکر جنت مرزا نے ایکسپریس انٹرٹیمنٹ کے پروگرام ’دی ٹاک شو‘ میں شرکت کی۔ پروگرام کے دوران جنت مرزا نے کہا کہ ’سوشل میڈیا پر ٹک ٹاک ویڈیوز بنانے پر انہیں والدین کی سپورٹ ہمیشہ حاصل رہی ہے، وہ دنیا کے کسی بھی ملک کا سفر کریں یا کسی ٹاک شو میں شرکت کے لیے جاتی ہیں تو والدہ ہمیشہ ان کے ساتھ ہی رہتی ہیں۔

انہوں نے کہا کہ اگر والدین آپ کے ساتھ نہیں ہے تو دنیا آپ کو گِرا دے گی لیکن جب والدین آپ کے ساتھ کھڑے ہیں تو دنیا کی کوئی طاقت آپ کو ہرا نہیں سکتی، والد نے ہمیشہ ایک حدود رکھی ہیں جس پر میں بھی اتفاق کرتی ہوں اور مجھے معلوم ہے کہ ان حدود سے تجاوز نہیں کرنا۔

جنت مرزا نے کہا کہ وہ ٹک ٹاکر بننے سے قبل والد کی طرح پولیس افسر بننا چاہتی تھیں، ’میں چاہتی ہوں کہ جہاں کسی مظلوم کے ساتھ غلط ہو رہا ہو وہاں میں ان کا دفاع کرنے پہنچ جاؤں، میری بہنیں بھی مجھے کہتی ہیں کہ میں ان کی بہن نہیں بلکہ بھائی ہوں۔

انہوں نے کہا کہ میں ہر 6 ماہ بعد جاپان جاتی ہوں، کیونکہ وہاں ہماری فیملی رہتی ہے، پاکستان میں نجی زندگی ختم ہوگئی ہے، گھر سے باہر نہیں نکل سکتی، باہر نکلو تو ہمیشہ ڈر لگا رہتا ہے کہ کوئی ویڈیو بنا کر سوشل میڈیا پر پوسٹ کردے گا۔

جنت مرزا نے منگنی ٹوٹنے کے سوال پر جواب دیا کہ ’آپ اگر کسی کے ساتھ نہیں چل سکتے تو اس رشتے کو اچھے طریقے سے ختم کر دینا بہتر ہے نہ کہ بہت بڑا ڈراما بنا دیا جائے۔ٹک ٹاکر نے کہا کہ پہلے میں شادی کے لیے لڑکا پسند کرتے ہوئے اس کی ظاہری خوبصورتی دیکھتی تھی لیکن اب چاہتی ہوں کہ لڑکا وفادار، مخلص، دیکھ بھال کرنے والا ہو۔وہ کہتی ہیں کہ مجھے لگتا ہے کہ جو انسان دل کا اچھا ہو اس سے شادی کرنی چاہئے، ظاہری شکل دیکھ کر انسان پھنس جاتا ہے۔

جنت مرزا نے بتایا کہ حال ہی میں میری بشریٰ انصاری سے خواشگوار موڈ میں ملاقات ہوئی، کبھی کسی ٹک ٹاکر نے کسی کے بارے میں بُری بات نہیں کی، ہم آپس میں ہی لڑتے ہیں لیکن کسی دوسرے کے کام یا کردار پر انگلی نہیں اٹھاتے، جنت مرزا نے یہ بھی انکشاف کیا کہ وہ جلد ٹی وی ڈراموں میں نظر آئیں گی۔

جنت مرزا نے یہ بھی انکشاف کیا کہ انہیں نامور ڈراما سیریل ’پری زاد‘ میں اشنا شاہ کا کردار اور ڈراما ’ہم کہاں کے سچے تھے‘ میں کبریٰ خان کا کردار کرنے کی آفر ہوئی تھی، مجھے پری زاد اور ہم کہاں کے سچے میں کردار ادا کرنے کی آفر ہوئی تھی بدقسمتی سے میں جاپان میں تھی، جس کی وجہ سے میں نہیں کرسکی۔

ٹک ٹاکر نے بتایا کہ مجھے آج بھی پچھتاوا ہے کہ کاش میں پاکستان میں ہوتی، مجھے نہیں لگتا کہ اشنا اور کبریٰ خان سے بہتر کردار ادا کرسکتی تھی، یہ دونوں بہت عرصے سے اس فیلڈ میں کام کر رہی ہیں، لیکن اگر میں کوشش کرتی تو شاید لوگوں کو میرا کام بھی پسند آتا۔

یاد رہے کہ جنت مرزا کے انسٹا گرام پر 4 لاکھ سے زائد فالوورز جبکہ ٹک ٹاک پر 22 لاکھ سے زیادہ فالوورز ہیں، وہ ٹک ٹاک پر پاکستان میں سب سے زیادہ فالو کی جانے والی ٹاک ٹاکر ہیں، اگست 2022 میں عمر بٹ نامی لڑکے کے ساتھ ان کی بات پکی ہونے کی خبریں بھی گردش کر رہی تھیں۔

جنت مرزا نے کہا تھا کہ ان کے رشتے کی بات پکی ہو چکی ہے جبکہ شادی کا اعلان بعد میں کیا جائے گا تاہم فروری 2023 میں جنت مرزا نے خود انسٹاگرام پر عمر بٹ کے ساتھ راہیں جدا کرنے کا اعلان کیا تھا، ساتھ ہی عمر بٹ پر بے وفائی کا بھی الزام لگایا تھا جس کے بعد یہ معاملہ سوشل میڈیا پر کافی وائرل ہوا تھا۔