عدالت نے مریم نواز کیخلاف ایف بی آر کے لیوی ٹیکس نوٹس پر عملدرآمد روک دیا

لاہور ہائی کورٹ نے مسلم لیگ (ن) کی نائب صدر مریم نواز کو فیڈرل بورڈ آف ریونیو (ایف بی آر) کے انکم سپورٹ لیوی ٹیکس کے نوٹسز پر علمدرآمد روک دیا۔
نائب صدر مسلم لیگ (ن) نے انکم سپورٹ لیوی ٹیکس نوٹنس کے خلاف لاہور ہائی کورٹ میں اپیل کی تھی۔ جسٹس امیر بھٹی کی سربراہی میں دورکنی بینچ نے مریم نواز کی اپیل پر سماعت کی۔ سماعت میں عدالت نے عدالت نے مریم نواز کو جاری ٹیکس نوٹسز کو معطل کردیے۔ علاوہ ازیں عدالت نے آئندہ سماعت پر ایف بی آر کو جواب جمع کروانے کا حکم بھی دے دیا۔ دوران سماعت وفاقی حکومت کے وکیل نے استدعا کی کہ اپیل کنندہ نے مقررہ وقت کے بعد اپیل فائل کی ہے اس لیے مریم نواز کی درخواست خارج کی جائے۔ جسٹس امیر بھٹی نے ریمارکس دیے کہ مریم نواز نے لاہور ہائی کورٹ کے سنگل بینچ کے فیصلے کے خلاف اپیل دائر کی تھی اور انہوں نے اپنی درخواست میں ایف بی آر سمیت دیگر کو فریق بنایا ہے۔ اپیل میں مریم نواز نے موقف اختیار کیا کہ ایف بی آر کی جانب سے 6 لاکھ 57 ہزار روپے کے انکم سپورٹ لیوی ٹیکس کے نوٹسز بھجوائے گئے ہیں۔ انہوں نے کہا کہ قانون کے مطابق سارے ٹیکسز ادا کر رہی ہوں اور تمام ٹیکسز ادا کرنے کے باوجود ایف بی آر نے ریکوری کے نوٹس بھجوا دیے ہیں۔ نائب صدر مسلم لیگ (ن) نے درخواست میں کہا کہ لاہور ہائی کورٹ کے سنگل بینچ نے ریکارڈ کا درست جائزہ لیے بغیر درخواست خارج کی۔ انہوں نے لاہور ہائی کورٹ سے استدعا کی کہ عدالت سنگل بینچ کا فیصلہ اور ایف بی آر کی جانب سے ارسال کیے گئے نوٹسز بھی کالعدم قرار دے۔
خیال رہے کہ ان دنوں مریم نواز کے خلاف 200 کنال اراضی غیرقانونی طور پر اپنے نام کرانے کے الزام کا سامنا ہے۔ اس ضمن میں گزشتہ ماہ اگست کے اوائل میں نیب نے 11 اگست کو 11 اگست کو پیش ہونے کی ہدایت کی تھی۔
مسلم لیگ (ن) کی نائب صدر مریم نواز پیش ہونے کےلیے نیب دفتر پہنچی تو اس موقع پر سخت ہنگامہ آرائی دیکھنے میں آئی اور کئی گھنٹوں بعد صورت حال کی کشیدگی کے پیش نظر نیب نے پیشی منسوخ کر کے مسلم لیگ (ن) کے رہنماؤں، کارکنان کے خلاف مقدمہ درج کروانے کا اعلان کردیا تھا۔ بعدازاں پولیس نے مسلم لیگ (ن) کی نائب صدر مریم نواز کی قومی احتساب بیورو (نیب) میں پیش کے موقع ہنگامہ آرائی سے متعلق مقدمے میں دہشت گردی کے دفعات شامل کردیں تھیں۔ اس واقعے کے بعد پریس کانفرنس کرتے ہوئے مسلم لیگ (ن) کی نائب صدر مریم نواز نے کہا تھا کہ جس ریاستی، حکومتی خوف، جبر اور دہشت گردی کا میں نے مشاہدہ کیا ہے وہ میرے لیے یا مسلم لیگ (ن) کے لیے نہیں بلکہ اس جعلی اور سلیکٹڈ حکومت کے لیے لمحہ فکریہ ہے۔