فواد عالم با صلاحیت ہے، کسی بھی وقت کھیل سکتے ہیں

قومی ٹیسٹ ٹیم کے کپتان اظہرعلی نے مسلسل نظر کیے جانے والے بلے باز فواد عالم کے بارے میں کہا ہے کہ فواد عالم میں صلاحیت ہے، وہ کسی بھی وقت کھیل سکتے ہیں، کنڈیشنز دیکھ کر کراچی ٹیسٹ کےلیے گیارہ کھلاڑی سلیکٹ کریں گے۔
بنگلا دیش کےخلاف راولپنڈی ٹیسٹ میں فتح کے بعد پریس کانفرنس کرتے ہوئے قومی ٹیسٹ ٹیم کے کپتان اظہرعلی نے کہا کہ حارث بولنگ بھی اچھی کرلیتے ہیں اس لیے ان کو کھلایا گیا ہے۔ اظہر علی نے کہا کہ میرا خیال ہے کہ اس وقت پاکستان کی ٹیسٹ ٹیم کو فاسٹ بولرز کو لیڈ کرنا چاہیے،میں نے شاہین شاہ کو ہمیشہ کہا ہے کہ تم نے ٹیسٹ کرکٹ میں بولرز کو لیڈ کرنا ہے۔ انہوں نے کہا کہ امارات میں بال جلدی اسپن ہوجاتی ہے لیکن پاکستان میں پہلے دو تین دن بال کم اسپن ہوتی ہے، یہاں پچز بہتر ہیں، بلے باز زیادہ رنز کریں گے۔
ان کا کہنا تھا کہ پاکستان کے بلے باز پچھلے کچھ سالوں سے باہر کے ملکوں میں اچھا پرفارم کرنا شروع ہوگئے ہیں، کوشش ہوگی کہ انگلینڈ اور نیوزی لینڈ میں بھی ایسے ہی جیتیں جیسے آج جیتے ہیں۔ اظہر علی نے بنگلادیش کی ٹیم کا دورہ پاکستان پر شکریہ ادا کرتے ہوئے کہا کہ انشاء اللہ وہ دوبارہ پاکستان آئیں گے۔