موجودہ صورتحال میں انتخابی عمل مخدوش ہو سکتا ہے

سربراہ پی ڈی ایم مولانا فضل الرحمن نے کہا ہے کہ موجودہ صورتحال کے دوران انتخابی عمل مزید مخدوش ہو سکتا ہے، سب لوگوں کو الیکشن کی فکر ہے جبکہ دوسری جانب ریاست ڈوب رہی ہے۔

مولانا فضل الرحمان نے پشاور میں پریس کانفرنس کرتے ہوئے کہا کہ کسی کے ہاتھ میں ڈالر ہے تو وہ اسے باہر بھیج رہا ہے، موجودہ صورتحال میں انتخابی عمل مخدوش ہوسکتا ہے، اس کام کا آغاز کرنے سے پہلے انجام اور نتائج کا سوچنا ہوگا۔

سربراہ جے یو آئی نے کہا کہ کون لوگ ہیں جو بند کمروں میں بیٹھ کر فیصلے کرتے ہیں اور خود کو عقل مند سمجھتے ہیں، میں چاہتا ہوں ہر سیاستدان جیل سے باہر ہو، اگر وہ قانون کے گھیرے میں آیا ہے پھر کوئی بھی اس سے باہر نہیں، ملک کا مجموعی انتظامی ڈھانچہ اس وقت زوال پذیر ہے، قوم کی ناراضی بڑھ رہی ہے، زبوں حالی کا شکار ہوتے جا رہے ہیں، ملک کی معیشت کی عمارت کو گرایا گیا، بغاوت کا خطرہ تھا۔