مولانا شیرانی کو مولانا فضل الرحمن کے خلاف کس نے کھڑا کیا؟

جمعیت علماء اسلام ف کے مرکزی رہنما مولانا محمد خان شیرانی کے اچانک پلٹا کھا کر وزیر اعظم عمران خان کی تعریف کرنے اور مولانا فضل الرحمان کے خلاف بیان بازی شروع کرنے کے عمل نے سیاسی حلقوں میں ہلچل مچا دی ہے۔ کچھ لوگ اسے اسٹیبلشمنٹ کی سازش سمجھتے ہیں تو کچھ کے خیال میں یہ حزب اختلاف میں تقسیم کو ظاہر کرتی ہے۔ مولانا شیرانی کے عمران خان کے حق میں بیان پر حکومتی حلقے بہت خوش نظر آتے ہیں اور ان کے خیال میں اپوزیشن کے لئے یہ بہت بڑا دھچکا ہے۔ تاہم جے یو آئی اور اپوزیشن رہنماوں کا کہنا ہے کہ مولانا شیرانی کی مخالفت سے حزب اختلاف یا مولانا فضل الرحمن کو کوئی فرق نہیں پڑٰے گا۔

یاد رہے کہ جمعیت علمائے اسلام کے سینئر رہنما اور سابق چیئرمین اسلامی نظریاتی کونسل مولانا محمد خان شیرانی نے اپنی ہی جماعت کے سربراہ مولانا فضل الرحمان اور انکی سربراہی میں قائم پی ڈی ایم کو اچانک نشانے پر رکھ لیا ہے اور ان کے خلاف تنقید کی بوچھاڑ کر دی ہے۔ فوجی اسٹیبلشمنٹ کے قریب سمجھے جانے والے مولانا شیرانی نے اسٹیبلشمنٹ کی زبان بولتے ہوئے یہ بھی کہہ دیا ہے کہ پی ڈی ایم ذاتی مفادات کے لیے قائم ہوئی اور یہ کی وزیر اعظم عمران خان اگلے 5 سال بھی پورے کریں گے۔ کوئٹہ میں صحافیوں سے گفتگو کرتے ہوئے مولانا شیرانی کا کہنا تھا کہ پی ڈی ایم والے مخاصمت کے لیے نہیں مفاہمت کے لیے اکٹھے ہوئے ہیں۔ ایک سوال کے جواب میں انہوں نے یہ بھی کہہ دیا کہ مولانا فضل الرحمان خود سلیکٹڈ ہیں، وہ عمران خان کو کیسے کہتے ہیں کہ وہ سلیکٹڈ ہے۔ شیرانی کا کہنا ہے کہ میں نے بہت پہلے کہہ دیا تھا کہ عمران خان اپنے پانچ سال مکمل کرے گا اور آنے والے پانچ سال بھی عمران خان کے ہی ہوں گے۔ انہوں نے کہا کہ میرا ماننا ہے کہ جمیعت علماء اسلام کسی کی ذاتی جاگیر نہیں، اگر کوئی ایسا سوچ رہاہے تو یہ اس کی خام خیالی ہے۔

دوسری طرف مولانا فضل الرحمن کے قریبی ذرائع کا کہنا ہے کہ مولانا شیرانی اس وقت مولانا مخالف ایجنڈے کے تحت اسٹیبلشمنٹ کی نوکری کرنے کی کوشش کر رہے ہیں جس کو جانب سے انکے ساٹھ کسی نہ کسی عہدے کا وعدہ بھی کیا گیا ہوگا۔ لیکن ان کا کہنا تھا کہ شیرانی کے الٹے سیدھے بیانات سے مولانا فضل الرحمن کو کوئی فرق نہیں پڑے گا۔ شیرانی کے ناقدین کا کہنا ہے کہ وہ ہمیشہ سے ایک سرکاری مولوی رہے ہیں اور اب بھی سرکار کے ٹٹو کا کردار ادا کر رہے ہیں۔

لیکن یہ پہلا موقع نہیں کہ جمعیت کے اندر سے سینیئر سطح پر کسی عہدیدار نے پی ڈی ایم کے اتحاد یا اس کے سیاسی مطالبات سے اختلاف کیا ہو۔ اب سے قریب دو ماہ پہلے بلوچستان سے جمعیت علمائے اسلام کے سابق سیکرٹری اطلاعات حافظ حسین احمد نے ایک نجی ٹی وی چینل کے پروگرام میں بات کرتے ہوئے یکایک پی ڈی ایم میں شامل سب سے بڑی جماعت مسلم لیگ نواز کے قائد نواز شریف پر شدید تنقید کا محاذ کھولتے ہوئے انہیں ’آستین کا سانپ‘ قرار دے دیا تھا اور کہا تھا کہ یہ خود ڈکٹیٹرز کی پیداوار ہیں اور آج اسی فوج کے خلاف بول رہے ہیں جنہوں نے انہیں بنایا تھا۔
تاہم، مولانا فضل الرحمٰن نے ان کے اس بیان پر سختی سے ایکشن لیتے ہوئے نہ صرف انہیں ان کے عہدے سے علیحدہ کر دیا تھا بلکہ خود مسلم لیگ نواز کی قیادت سے ملاقات بھی کی تھی۔ وہ اگلے ہی روز لاہور میں سردار ایاز صادق کے گھر پر نواز لیگ کی سینیئر قیادت سے ملاقات میں تمام معاملات کو ٹھیک کر کے گئے تھے۔ مسلم لیگ ن کی جانب سے بھی کسی قسم کا احتجاج دیکھنے میں نہیں آیا تھا اور اسے ایک ایسا ہی معاملہ سمجھا گیا تھا جیسے پیپلز پارٹی کے اندر اعتزاز احسن گاہے گاہے نواز شریف اور ان کی صاحبزادی مریم نواز پر تنقید کرتے رہتے ہیں۔ خواجہ آصف بھی ماضی میں پیپلز پارٹی کے سربراہ آصف علی زرداری پر کھلے عام عدم اعتماد کا اظہار کر چکے ہیں۔ اس معاملے پر بھی پی ڈی ایم میں بدمزگی کا امکان تھا لیکن جلد ہی اس معاملے کو بھی ٹھنڈا کر دیا گیا تھا۔

تاہم، یہ پہلا موقع ہے کہ پی ڈی ایم کی کسی بڑی جماعت کا کوئی صفِ اول کا لیڈر اپنی ہی جماعت کے خلاف اٹھ کھڑا ہوا ہے۔ گو کہ مسلم لیگ نواز میں بھی پنجاب اسمبلی کے ایک، دو اراکین قیادت کی پالیسیوں پر تنقید کر چکے ہیں لیکن ان کی پارٹی قیادت میں کوئی اہمیت نہیں تھی۔ مولانا شیرانی نہ صرف جمعیت علمائے اسلام کے سینیئر رہنما ہیں بلکہ جماعت کے بلوچستان چیپٹر کے کلیدی رہنماؤں میں سے سمجھے جاتے ہیں۔ ان کے اس وقت مولانا کے خلاف محاذ کھولنے سے قیاس آرائیاں بالکل جائز ہیں۔ تجزیہ۔کاروں کے خیال میں اس حوالے سے تین معاملات انتہائی اہم ہیں جن پر نظر رکھنا ضروری ہے۔

پہلا یہ کہ مولانا شیرانی موجودہ حکومت اور وزیر اعظم کے مشیر علامہ طاہر محمود اشرفی کے انتہائی قریب سمجھے جاتے ہیں کیونکہ وہ اسلامی نظریاتی کونسل کے رکن بھی ہیں اور جمعیت علمائے اسلام سے ایک ایسے رہنما ہیں جو قانون سازی کے حوالے سے حکومت کے ساتھ قریبی رابطے میں رہتے ہیں۔ دوسرا یہ کہ حافظ حسین احمد کی طرح مولانا شیرانی کا تعلق بھی بلوچستان سے ہے۔ جمعیت علمائے اسلام کی بلوچستان میں خاطر خواہ حمایت موجود ہے اور بلوچستان نیشنل پارٹی کے حکومتی اتحاد سے باہر آنے کے بعد جمعیت کے پاس یہ موقع ہے کہ وہ تحریک انصاف کو بلوچستان حکومت سے نکال باہر کرے اور بلوچستان عوامی پارٹی سے خود اتحاد کر کے یہاں حکومت بنا لے۔ لہٰذا پارٹی کی بلوچستان قیادت کے سامنے صوبائی حکومت کی پیشکش بھی یقینی موجود ہوگی۔ تیسری اور سب سے اہم بات یہ ہے کہ جمعیت علمائے اسلام دراصل پاکستان میں دیوبندی مکتبہ فکر کا سیاسی چہرہ ہے اور اس کے دو گروہوں، یعنی جے یو آئی (فضل) اور جے یو آئی (سمیع) میں سے مولانا سمیع الحق کے انتقال کے بعد جے یو آئی (سمیع) انتہائی کمزور ہو چکی ہے اور فضل الرحمان سے باغی ہونے والوں کے لئے ایک ایسی جماعت کھلی تجوری کی طرح موجود ہے۔ اس سے پہلے فضل الرحمان گروپ میں سے دیگر قائدین کے بارے میں بھی جے یو آئی (سمیع) میں جانے کے حوالے سے خدشات موجود ہیں۔

اب دیکھنا ہوگا کہ آیا مولانا اختر شیرانی کے یہ جملے جمعیت علمائے اسلام (ف) میں ایک بڑی بغاوت کا پیش خیمہ ثابت ہوتے ہیں یا جیسے حافظ حسین احمد کو دودھ میں سے مکھی کی طرح عہدے سے علیحدہ کر دیا گیا تھا اور کوئی بیان تک سامنے نہیں آیا تھا، یہ سب بھی چائے کی پیالی میں طوفان ہی ثابت ہوتا ہے۔ واضح رہے کہ مولانا شیرانی نے اپنی گفتگو میں خود ہی مولانا فضل الرحمان کو اپنے خلاف ایک بڑا ہتھیار یوں فراہم کر دیا ہے کہ انہوں نے اسرائیل کو تسلیم کرنے کے حوالے سے بھی اپنا مؤقف دیتے ہوئے کہا ہے کہ اسرائیل سے پاکستان کی کوئی براہ راست لڑائی نہیں، عربوں کی لڑائی تھی، اور اگر وہ خود دوستی کر رہے ہیں تو اب پاکستان کو بھی یہ بات مان لینی چاہیے۔
 
دوسری طرف مولانا فضل پہلے دن سے عمران خان کو یہودی ایجنٹ کہتے آئے ہیں۔ اب وہ کہہ سکتے ہیں کہ عمران خان کی حمایت میں بولنے والا جمعیت کا رکن بھی اسرائیل کی حمایت میں بول رہا ہے۔ تاہم، ان کی ایک مجبوری یہ بھی ہے کہ مولانا شیرانی عربوں کے بہت قریب سمجھے جاتے ہیں۔ اور یہ اسرائیل کو تسلیم کرنے کے حق میں بیان بھی انہوں نے یوں ہی نہیں دیا ہوگا۔ کیا مولانا فضل الرحمان اپنی عمران خان کے خلاف لڑائی میں اسرائیل کارڈ استعمال کرتے ہوئے عربوں کو ناراض کرنے کے متحمل ہو سکتے ہیں؟ یہ سوال جمعیت کے ساتھ ساتھ پی ڈی ایم اور حکومتی لڑائی کے تناظر میں اب ملکی سیاست میں بھی ایک اہم سوال بن کر ابھر رہا ہے۔

تاہم جمعیت علماء اسلام فضل میں مولانا شیرانی کے ناقدین کا کہنا ہے کہ مولانا شیرانی کی جمعیت میں کوئی اہمیت نہیں اور ان کے اس بیان سے جماعت کو فرق نہیں پڑے گا۔ مذہبی جماعت کی مرکزی شوری کے رکن جلال الدین نے بتایا کہ مولانا شیرانی گزشتہ پانچ برسوں سے پارٹی میں غیر فعال تھے۔ اس وقت بھی ان کے پاس جمعیت کا کوئی عہدہ نہیں ہے۔ انہوں نے یہ بیان ریاستی طاقتوں کو خوش کرنے کے لئے دیا ہے لیکن اس سے جمعیت کو کوئی فرق نہیں پڑے گا۔ ان کا مزید کہنا تھا کہ یہ بات صحیح ہے کہ مولانا شیرانی کو ابھی تک پارٹی سے اعلانیہ نکالا نہیں گیا لیکن ان کے جمعیت سے اب باقاعدہ اخراج کا مسئلہ اگلے اجلاس میں ممکنہ طور پر زیر بحث آسکتا ہے۔ ان کے خیال میں ایسے کمزور ایمان والے عناصر کو اسٹیبلشمنٹ مولانا فضل کے خلاف استعمال کر رہی ہے۔